IT業界社群及資訊平台

【照妖鏡】iOS 14 取用權限透明化 IG 被爆暗中開啟用戶攝錄機

Apple 即將喺秋季推出 iOS 14,相信將成為唔少別有用心嘅手機應用程式開發商死敵,事關有唔少安裝咗測試版嘅人都表示,有部分 app 會暗中啟動剪貼簿、相機功能,引發個人私隱外洩疑慮。而最新出事嘅 app,就係 Facebook 旗下嘅 Instagram 喇!

今年 6 月,Apple 喺 WWDC 年度大會上公布 iOS 14 嘅新安全功能,包括會增加應用程式取用權限嘅透明度,例如會顯示每個 app 喺背景執行緊乜嘢權限,以及限制位置分享範圍,保障用家嘅個人私隱。Apple 隨後推出開發者測試版,俾開發員用嚟做系統測試。而就喺當時,已經有用家發現 TikTok 會暗中存取 Clipboard 入面嘅資料,令人懷疑收集呢啲訊息嘅用意。雖然 TikTok 回應只係用嚟偵測垃圾訊息,但最後都移除咗呢個動作。除此之外,LinkedIn 及 Reddit 亦先後被用家舉報有相同舉動。

而今次另一個被踢爆暗中啟動攝錄機功能嘅主角,就係唔少香港人都有用嘅 Instagram,有 Twitter 用家表示,當佢睇完 Instagram 後,竟然喺 iOS 14 測試版嘅控制中心,發現 Instagram 喺背景啟動咗攝錄機!有外國傳媒即時向 Facebook 追問,Facebook 就回應話呢個純粹係一個 bug,而且只會喺 iOS 14 測試版上出現,叫大家唔使諗得太多。所以話,iOS 14 有咗呢個咁透明嘅功能,真係會令手機應用程式開發者好頭痕,不過就變相令佢哋唔可以立亂攞太多無關嘅權限,如果唔係關公真係會好忙㗎!

資料來源:http://dailym.ai/3hMTdpS

唔想錯過熱門網絡保安消息,請即訂閱 wepro180 電子周報:https://bit.ly/2ZcCi9J