IT業界資訊媒體

【洋蔥路由器】CIA、毒販、色情行業人士的共通點

TOR project 剛啱為 Android 用家推出完全版 Tor Browser,上網瀏覽就可完全消聲匿跡。 Tor Browser 到底係乜?其實係指 TOR(The Onion Router)洋蔥路由器嘅專用瀏覽器。 TOR喺上世紀 90 年代中期由美國海軍研究實驗室員工開發,發展到而家,就連 CIA、毒販、色情行業人士都用,你話幾可靠呢?不過,iOS 用家就唔使諗喇。

 

TOR網絡 three-hop system 消痕跡
TOR 嘅出現,原意係為咗保護美國情報人員係網上不留痕跡地通信。呢種網上匿名服務,喺 2002 年起開放為 open source 普渡眾生,其後喺 2006 年轉由一間命名為 Tor Project 嘅非牟利機構監管。其實 TOR 喺近年已經廣泛咁俾唔同人士使用,包括要避開政權攻擊嘅社運人士、專門揭密嘅傳媒,保護國家安全嘅部門,甚至連毒販、殺人組織、軍火販賣商、色情行業人士都有,其他仲有唔多想俾網上廣告跟蹤嘅普通用家,亦一樣會使用。

 

TOR 之所以能夠保護你上網時嘅身份,係因為由上網裝置發出上網指令,到真正去到目標網站嘅過程中, TOR 會將你嘅 IP address 進行三次以上嘅加密,而且會以跳板方式、通過世界各地數以萬計嘅 volunteer 電腦,隨機選擇其中三部,每部電腦執行一次加密及解密,令訊息難以追源,連幫你解密及轉發上網指令嘅電腦、互聯網服務供應商,甚至你訪問嘅網站或服務供應商,都無法識別你嘅痕跡,呢個「遊花園」過程稱之為 three-hop system。TOR 嘅匿名功能唔單只可以為個人隱藏網絡行蹤,就連 server 位置都可以,所以深受各方面嘅犯罪者愛戴,衍生出嘅 Dark Web 暗網,以及一系列無法喺地面上公開位置嘅網上服務。但請注意,用 TOR 上網並唔係百分百無痕跡,因為由 three-hop system 跳出到目標網站時(稱為exit node),最後一部 volunteer 電腦係睇到你連接網站時進行嘅活動,只係難以追蹤執行呢個動作嘅人嘅身份。

 

一般用家如果只係想消除上網痕跡,最基本和最常用到 TOR 嘅方法,就係由 TOR Project 網站下載及安裝 Tor Browser,而家仲可以喺 Android 裝置上使用。之不過,想消除上網痕跡係要付出代價,試用過 Android 版本嘅 Tor Browser 之後,就會發現上網速度明顯減慢,同時亦增加身份驗證要求,以及去唔到部分網站。

 

網速減慢嘅原因好簡單,試想像上網指令要通過全球各地嘅 volunteer 電腦跳板,層層加密及解密,自然增加網絡延時,拖慢傳輸速度,上多圖嘅購物平台非常吃力,基本上連標清(720p)影片都唔會睇到。此外,用嚟核實登入人士身份嘅機械人驗證機制,亦會因為隱藏咗 IP 位址及登入歷史,而令到你每次進入都有需要填寫。而最最最重要嘅一點係,Google、Facebook、Amazon 等網站,通常都會拒絕 TOR 連線,同時 Tor  Browser 亦會禁用 Java、Flash  等易被加插病毒、木馬或洩露位置嘅功能,所以睇網站時好大可能只會睇到殘缺版頁面。 至於 iOS 用家,因為 Apple 一向對第三方廠商開發瀏覽器嘅規格甚嚴,而且亦要求對方使用佢哋嘅搜尋引擎,所以應該就唔會有得用嘞。

 

相關文章:【攬炒】 華爾街市場 人人自危 歐美聯手搗破第二大暗網
`