IT業界資訊媒體

【Google割席】小米Mi Home全線產品禁連Google Home

IoT(Internet of Things)中具有監視鏡頭功能嘅產品真係頻頻出事,啱啱 Amazon 旗下嘅 Ring 監視鏡頭先俾黑客入侵,通過鏡頭恫嚇用家或引誘用家嘅子女上鏡,嚇到有用家要告上法庭。而最新消息係,又有用家發現小米米家(Mijia)嘅監視鏡頭竟然會將畫面傳送去其他用家度,搞到 Google 即刻將所有小米 Mi Home 產品由 Google Home 及 Assistant 上切斷連線。你話裝個監視鏡頭喺屋企幾危險先得㗎,我就不了!

小米米家最近先喺內地惹上官非,因為米家商標同杭州一間安防工程公司撞名,最終敗訴,被法院判罰約 1210 萬人民幣。而喺前日,就輪到小米米家監視鏡頭出事,事緣用家 Dio-V 喺 Reddit 上出post,話自己將鏡頭連接去 Google Home Hub 智能管家之後,喺點選 Camera 想睇下鏡頭畫面時,竟然會隨機播送一啲唔屬於自己鏡頭嘅相及串流畫面,部分應該係其他用家嘅家居環境,因為唔單只見到人瞓喺櫈上面,仲可以見到 BB 床添!Dio-V 嘅情況公開後,網上即時好大迴響,除咗有用家擔心自己或屋企人嘅影像會網上見,亦有人擔心會唔會係小米暗中做緊監控?

雖然唔知呢啲到底係咪小米用嚟測試嘅畫面,但Google 收到呢個消息後就即刻進行調查,發現的確出現問題後,就毫不猶豫咁將所有小米嘅 Mi Home 智能家居產品,強制由 Google Home/Nest Hub 及 Google Assistant 斷線,等佢唔可以再經由呢兩個渠道嚟接觸到用家嘅私隱,仲正式公布話一切有待小米解決問題後,先決定係咪准許佢嘅智能家居產品再度上線。至於小米方面,現時就仲未有任何回應,相信現階段仲調查緊,如果大家屋企有買到小米鏡頭,最好都係暫時停用好啲。

資料來源:https://bit.ly/2tmqHr4

相關文章:【國家任務】IoT生產商注意 安全法規準備上馬