IT業界資訊媒體

【AI 照騙】Nvidia GauGAN 繪圖神器 唔自然畫出自然相

之前我哋都報導過 AI 照騙嘅新聞,由人工智能合成出嚟嘅人像照真係呃到唔少人。不過,圖像處理器生產商 Nvidia GauGAN 繪圖神器就更驚人,只要喺電子畫板上畫幾筆,AI 系統已經識得根據形狀同顏色,「判斷」到底畫出嚟嘅山、水、雲、樹、石頭究竟係乜嘢形態,光暗位點分佈,然後自動再變成一張風景相,驟眼睇真係呃得吓人!

【AI 照騙】Nvidia GauGAN 繪圖神器 唔自然畫出自然相
左邊係塗鴉,右邊係 GauGAN 理解出嚟嘅自然景色。
GauGan 神理解能力

Nvidia 公佈嘅示範片段可見,程式員喺一個類似小畫家嘅介面上隨便塗鴉,用咗幾種分別代表住天空、水、樹林、草地嘅綠色同藍色,講真出嚟嘅畫作真係抽象過抽象畫,但轉眼間 GauGAN 已經變咗幅晴天之下山中湖泊嘅風影相出嚟,水入面仲要有埋倒影!又試過喺一大片代表住石頭嘅啡色色塊上用水藍色加條線, GauGAN 竟然解讀成一條瀑布由斷崖飛瀉而出,「理解」能力超晒班。

【AI 照騙】Nvidia GauGAN 繪圖神器 唔自然畫出自然相
整個變換過程幾乎係即時進行,不過細睇之下當然有好多瑕疵。

不過,GauGAN 繪圖神器嘅強項唔單只係理解能力,佢喺閱讀咗過百萬張風景相後,仲識得根據「現場環境」,去判斷實際嘅天氣應該係點;例如當地面有雪, GauGAN 就會認為天氣一定比較差,進而將天空嘅顏色調校至灰暗。見到呢個軟件嘅能力咁高強,大家自然好想下載嚟試玩。不過可惜嘅係,GauGAN 只係一個研究項目嚟,只會喺美國矽谷呢幾日舉辦嘅 GPU Technology Conference 上有得試玩。

影片位置:https://www.youtube.com/watch?v=p5U4NgVGAwg

資料來源:https://bit.ly/2TgHDqj