IT業界資訊媒體

【3蚊搞掂】低科技矽膠保護套 KO 高科技Samsung S10指紋鎖

Samsung S10 嘅超聲波指紋鎖,推出以嚟真係問題多多,例如之前有黑客成功用 3D 打印嘅指紋嚟破解指紋鎖,又因為超聲波掃描技術要緊密接解手指嘅關係,唔可以用無法緊貼住屏幕嘅玻璃保護貼,令到用家無乜選擇。而最新發現,原來要解指紋鎖係唔使咁麻煩嘅,只係一個廉價矽膠保護套,就可以令指紋鎖無效化,如果唔見咗部手機而又有設定到電子付款,今次真係可以俾人盜用嚟購物!

發現呢個大漏洞嘅人並唔係乜嘢安全專家,只係英國一個尋常女用家 Lisa。話說佢最近收到老公送嘅 Samsung S10 後,就諗住買個保護套嚟保護個曲芒。點知 Lisa用3蚊英磅買咗個矽膠保護套返嚟之後,就發現指紋鎖竟然廢咗武功,佢本身只係登記咗一隻指紋用嚟解鎖,但戴咗套後就變成十隻手指就開得到;唔單只咁,就連佢老公嘅指紋一樣得。由於 Lisa 嘅妹妹都係用 Samsung S10,經測試後發現個套一樣可以令指紋鎖無效化!相信事件嘅元兇就係個矽膠保護套喇。

Lisa 即刻打去 Samsung 客戶服務部舉報呢件事,不過 Samsung 職員遙距檢查完部機之後,暫時都未搵到原因,只係建議用家唔好用非原廠嘅配件。不過呢個建議其實都幾無內容,因為如果有人存心想解開 S10 用家嘅手機,都會識得自己袋定個矽膠套喺身,唔會因為你用緊原裝套就破解唔到。所以話,今次高科技超聲波指紋鎖,真係俾低科技產品成功 KO 喇!

順帶一提,Samsung 嘅 Note 10 系列亦係採用呢種超聲波掃描技術,所以同樣都可以被破解。其實上美國 Samsung 官網嘅留言區,亦會搵到有用家投訴指紋鎖唔多穩陣,甚至有朋友可以開到自己部機,到底係咪呢個超聲波技術有問題呢?

資料來源:https://bit.ly/2IVmP5b

相關文章:【大件事】Samsung S10 漏洞 3D 打印指紋輕鬆解鎖

Privacy Preference Center