IT業界資訊媒體

【騎刧帳戶】黑客抬高 Facebook 踩 Twitter

呢幾年靠社交媒體搵食嘅,或多或少都認同 Facebook 嘅廣告費愈嚟愈貴,等於租間鋪,賺埋賺埋全部交晒租俾 Facebook,好似幫佢打工咁款!最近就有嚟自杜拜嘅黑客集團 OurMine,諗到個別開生面嘅方法,成功透過 Facebook 免費做 promotion,一蚊都唔使俾,到底係乜嘢方法咁鬼正?

登登登櫈,咪就係入侵 Facebook 嘅 Twitter 同埋 IG 帳戶囉!上星期五(2月7日),OurMine 成功破解咗 Facebook 喺 Twitter 嘅官方帳戶,發 tweet 話 Facebook 都唔係完全破解唔到,不過佢嘅安全性又的確比 Twitter 好少少嘅,寸到爆!雖然 Facebook 好快發現騎刧件事,即時刪除篇貼文,但 OurMine 喺刪文後又即刻貼文,今次仲搞埋 Facebook Messenger 嘅官方 Twitter 帳戶同埋 Facebook 嘅官方 Instagram 帳戶,如事者糾纏咗半個鐘,Facebook 先成功拯救返帳戶,搞到 Facebook 勁尷尬。

Facebook 方面未有直接回應事件,但係 Twitter 就衝出嚟話唔關佢哋事,檢查過冇被入侵平台嘅痕跡,出事原因係 OurMine 入侵咗一個用嚟管理社交媒體嘅第三方平台俾,從而引發今次事件,而Twitter 已經即時封鎖咗有問題嘅帳戶。ESET 保安專家 Jake Moore 就話,以往 OurMine 最鍾意喺地下渠道搵發放出嚟嘅登入密碼,但今次就疑似用咗「重設密碼」功能,靜靜雞換咗第三方平台嘅登入密碼,不過該平台就一直冇回應事件。

講返今次主角 OurMine,佢早年已經好紅,靠入侵名人同埋大公司帳戶而出名,2017 年就試過入侵 HBO 嘅官方 Twitter 帳戶,連神劇 Games of Thrones 嘅官方頁面都被留低腳毛。最新戰績係入侵咗美式足球聯盟(NFL)十幾隊球隊嘅官方 Twitter 帳戶,佢哋就話呢啲入侵行為係冇惡意嘅,只係希望透過呢啲舉動,喚起大家留心網絡安全嘅意識……信唔信就大家自己諗喇!

資料來源:https://bit.ly/2ShtnjW

相關文章:【針拮到肉識痛】Twitter停用SMS出tweet功能