IT業界資訊媒體

【靜靜雞查你位置】iPhone 11又爆私隱危機

iPhone 11 登場,宣傳一浪接一浪,同以往一樣,Apple 拍咗一系列廣告,去宣傳 iPhone 11 有幾好用,當中一條真係好 catching,用「Privacy. That’s iPhone.」做tagline,話俾你知 iPhone 11 有幾咁關心你嘅私隱……結果,當然係唔好太認真啦,廣告嚟嘅啫!

點解我咁講?事緣資安網站 KrebsOnSecurity 喺今年 11 月中發現咗件怪事,就係佢哋用部新買嘅 iPhone 11 Pro 嘅時候,即使熄晒手機入面所有關於位置服務嘅設定,部機每隔幾分鐘都會出現拎位置資訊嘅箭咀圖標,無論點樣搞個設定,都係冇法子停止呢個狀況。咁既然有問題,當然係寫封信去 Apple 問下,網站仲專登將成個情況錄成短片俾 Apple 睇,確保佢哋明白問題所在。

結果等咗兩個星期,去到 12 月初蘋果先有回應,解釋話呢個係「正常現象」,並唔涉及安全問題。Apple 工程師話就算閂晒所有置服務嘅設定,都會有啲系統服務會繼續運作,叫大家唔使擔心。但就算唔計 Apple 用保護用戶個人私隱嚟大賣廣告,明明 iPhone 11 設定位置服務嘅畫面,大大隻字寫咗篇私隱政策聲明,話只要用戶熄咗位置服務嘅設定,就唔會出現箭咀圖標,咁你叫我點唔擔心先?

無法子啦,KrebsOnSecurity 唯有將佢嘅發現,加埋 Apple 嘅回覆,一次過貼出嚟等讀者自行判斷,點知今次唔使等兩個星期,兩日後又再收到 Apple 嘅官方回覆,話唔使咁緊張嘅,其實呢個系統服務呢,就唔係記錄機主位置嘅,只係開咗 Ultra Wideband 啫,呢個功能可以俾 iPhone 了解自己身處嘅位置,同其他支援相同技術嘅手機嘅相對位置,方便用家短距離傳輸檔案俾其他 iPhone 用家,既然大家有所顧忌嘅,Apple 承諾話下次更新 iOS 時,會提供完全停用位置服務嘅設定,大家記得到時留意下有冇找數喇!

資料來源: https://bit.ly/36hhpe5 

相關文章:【突破盲腸】輕取一個權限 將Android手機變監控機器

 

Privacy Preference Center