IT業界資訊媒體

【電競邪道】Fortnite 玩家玩陰招 下載開掛程式即遭天譴

電競熱潮直捲全球,唔少後生仔都夢想成為電競選手,可以靠打機搵食。不過,真正嘅電競手一啲都唔易做,日日都要打十個鐘頭機,仲要操體能,所以連香港跳高隊代表楊文蔚都話:「電競同田徑一樣咁難行,跨得過你就係運動員。」

啱㗎,所以大部分人打機其實志在 kill time,邊會覺得可以靠佢搵食。之不過,有啲無 game 品嘅人明明唔夠人打,但又唔肯認輸,於是就想靠邪道威威,上網搜尋有無秘技或程式可以修改遊戲,情況就等於運動員食禁藥一樣。

最識得利用人性弱點嘅黑客又點會放過機會?早前網絡安全公司 Cyren 專家就發現,網上有一個連線射擊遊戲《Fortinite》嘅遊戲修改程式 Syrk,聲稱只要下載及執行 SydneyFortniteHacks.exe,就可以提升玩家嘅開槍準繩度,但實際上 Syrk 係一隻勒索軟件。當用家執行檔案後,就會發現電腦內的圖像、影片、文件同埋音樂檔案全部被上鎖,同時畫面會顯示一段「你已經被綁架」嘅訊息及聯絡電郵地址,要中招者用電郵聯絡,商討俾幾多同點樣俾贖金。為咗加強真實感,黑客仲喺畫面上加咗個計時器,指兩個鐘內唔採取行動,所有檔案就會被刪除。

專家指出 Syrk 其實係以一隻開源勒索軟件 Hidden-Cry 為基礎修改而成,佢嘅源碼喺上年放咗喺 GitHub 俾人下載使用,所以話呢個世界真係乜都會有人分享,只要有心機喺網上面搵就得。幸運地,專家發現用嚟解鎖嘅工具同時放埋喺受害者嘅電腦入面,只要打開一個叫做 dh35s3h8d69s3b1k.exe 嘅執行檔,就可以幫檔案解鎖。

其實都係打機啫,搞到要出陰招嚟贏人又有乜意思?有啲體育精神好唔好?

資料來源:https://bit.ly/2HynZ6f

相關文章:【有伏】安全模式移除 SimBad 病毒遊戲