IT業界資訊媒體

【防毒軟件大比併】免費防毒軟件掂唔掂?

阿媽教落,平嘢冇好,好嘢冇平。何況免費?一般用家都會捨得花錢購買防毒軟件套裝,以求為電腦作最好保護,至於免費軟件,當然冇咁好啦咪住,德國獨立調查組織 AV-test 竟然唱反調,話免費嘢都有好嘢。

收費防毒軟件固然好,依家嘅產品又防病毒又防勒索又防火牆,更有密碼保護、防零日攻擊之類。不過,依家嘅攻擊日新月異,產品必須要經常檢討,而 AV-test 就一直持續研究市面各款防毒軟件套裝,每隔幾個月就發表報告,等大家知道邊款防毒靠得住。AV-test 分別以保護能力、效能表現及可用性三項進行評分,以往收費嘅產品要比免費嘅表現好得多,不過最近嘅一份評分報告,就有啲新啟示。

例如 Microsoft Windows Defender 以往都係成績一般,AV-test 評為「Baseline」產品,幾近聊勝於無。最近 Windows Defender 嘅整體評分已經攀升至「Certified」級別,雖然未到 Top Product」。不過,如果從保護能力單一項目睇,你會發現,Windows Defender 排第 6 位!比起好多收費防毒軟件仲要強!AV-Test 指出,Windows Defender 於測驗中阻擋咗全數 259 個零日攻擊,以及 99.9 惡意軟件。而 Avast 嘅免費防毒軟件仲勁,零日攻擊及惡意軟件全數阻擋晒。當然,Windows Defender Avast 有其不足之處,例如會拖慢安裝 App 嘅速度,以及有失誤。

雖則大部份收費防毒軟件表現都非常之好,例如 McAfee 可以捕捉所有惡意軟件同時保持電腦運算表現。不過,報告的啟示就係,今時今日免費防毒軟件已經好勁,有可能更勁,大家係咪可以考慮慳返?

資料來源:http://bit.ly/2sYLEVv