IT業界資訊媒體

【關公災難】Samsung 提醒電視用家定期掃毒 反被懷疑隱瞞事實

關公災難近來接二連三爆出,一班公關認真忙,緊急安排完深夜時分嘅記者會解畫都算,完會後又要再度新聞稿為解畫而解畫,心血少啲都應付唔嚟。不過,又唔係所有關公災難都由老闆或高層引起,有時公司其他團隊都無諗過出於好意會便咗踩地雷,認真難搞。

最新出事嘅係美國 Samsung 支援部,早兩日佢哋喺 Twitter 上開 tweet 提醒智能電視嘅用家,內文話唔單只要定期為電腦掃描惡意軟件及病毒,如果 QLED TV 有連接 Wi-Fi,都一樣要每隔幾個禮拜就要用內置嘅安全應用方案去掃描電視先得,同時仲提供埋手動啟用 QLED TV 安全系統嘅視頻。

成件事嚟到呢度都好正路,點知 Twitter 上嘅 followers 突然爆 seed,質問點解要手動掃描而唔係自動掃描?又話只係想睇電視啫點解要俾部低能電視佢哋?最重要一點係有人懷疑係咪已經發生咗安全事故或出現咗漏洞,所以先失驚無神叫用家掃毒?

Samsung 其後曾經嘗試為今次關公災難解話,指出今次開 Tweet 純粹係教育用途,並唔係發生咗事故或隱瞞事實,仲叫大家如果有問題可以繼續搵佢哋幫手。不過用家嘅反應實在太激烈,嚇親 Samsung 搞到要即時刪 tweet。

先唔理今次關公災難嘅內容係真定假,但相信好多 Samsung 用家都唔知自己部電視原來係有掃毒功能。原來 Samsung 嘅 Smart TV 安全技術分兩個層面:作業平台上會偵測及攔截未經授權嘅連接,而應用軟件層面就會保護連線服務及阻止惡意代碼執行。而上述嘅掃描功能,就可以俾用家手動偵測有無惡意軟件成功瞞過安全系統所用。雖然唔知點解呢項功能唔係預設成自動執行,但要啟動的話,只要去 Options> General > System Manager > Smart Security,再按 Scan 就得。

資料來源:https://bit.ly/2IOXvNn

相關文章:【教主都玩】專家展示 Smart TV 安全漏洞 假警報打斷 Steve Jobs 演講