IT業界資訊媒體

【關公災難】擬似釣魚電郵通知改密碼 訊息模糊惹洩密恐慌

如果失驚無神有日收到其中一個網站發出電郵叫你重設密碼,作為登記用戶,你第一時間會諗啲乜呢?到底呢封係釣魚電郵,定係網站洩漏咗用戶嘅帳戶資料至要重設呀?

釣魚電郵係近年黑客最常利用嘅攻擊手段,所以一般人都對呢啲電郵提高警惕,唔會隨便點擊入面嘅連結。雖然網絡專家叫用家只要檢查清楚發信人嘅電郵地址係咪真確,又無暗中擺入假 link,就可以避免俾黑客暗算,但始終大家只係區區一介網民,有得揀都唔會亂 click 啦,何況仲要叫用家㩒掣重設密碼?

講緊嘅係外國一個專門售賣二手鞋同古著嘅網站 StockX,因為犯咗一個輕微錯誤,搞到喺 Twitter 上俾網站會員瘋狂查詢。事緣最近網站升級,唔知係咪提升咗登入密碼嘅要求定係其他原因,所有登記會員都要重新設定密碼。StockX 為咗提醒用家呢件事,於是就發出電郵啦,但內容只係幾隻字交代網站升級,叫網民㩒掣重設密碼,然後就無其他資訊,試問網民又點會第一時間點擊?梗係要檢查下發出電郵嘅網絡、附帶嘅連結按掣有無古怪先啦。不過就算檢查完發現無錯,今時今日都要再做多次 fact check ,所以有網民就喺瀏覽器輸入官網網址,嘗試唔㩒個掣去睇下乜事,跟住就發現無法登入,一定要改密碼先。

謹慎嘅會員就懷疑到底點解要改密碼呢?係咪網站俾黑客入侵搞到會員資料外洩?所以就走去  Twitter 上 StockX 發生乜事,搞到 StockX 方面突然要回應好多人嘅查詢,澄清並無發生資料外洩,令到原本只係一件通知會員更新密碼嘅小事,升級成為關公事件。

奉勸大家一句,以後向會員或用家發送電郵之前,都要睇清楚有無交代清楚內容,最好就代入收信人角色諗下有無破綻啦。

資料來源:https://bit.ly/2YlyZhx

相關文章:【學是學非】釣魚電郵專攻焦慮心理 Google 是非題教你分詐騙破綻