IT業界資訊媒體

【還原靚靚拳】Adobe 一鍵拆除 PS 裝甲 人工智能學習睇穿照騙

騙徒手法層出不窮,唔單只可以用人工智能(AI)創造假人像相,就連假短片都可以整埋出嚟!要對付呢啲網絡詐騙,可以用乜嘢方法?原來都係要靠 AI。

上星期,Facebook 首席執行官 Mark Zuckerbery 一段假視頻被放上網,原因係 Facebook 拒絕刪除平台上一段以 Deepfake 技術創造嘅虛假議員視頻,所以有藝術家就以其人之道還治其人之身。呢段假視頻嘅像真程度都算中上,反映而家人工智能嘅能力非常之高,比起以前淨係用嚟執相嘅層次已經唔同晒。

 

以前放相喺即時交友通訊工具搵食,十居其九會放型男美女嘅相,小部分識得修圖嘅人就會用 PhotoShop 嚟執靚個樣。不過而家美圖 app 氾濫,自動 PS 功能強到無朋友,基本上除咗連美圖 app 都執唔掂,否則個個都係用手機一拍搞掂。唔想活在 Fake Face 世界,可以點算?

【還原靚靚拳】Adobe 一鍵拆除 PS 裝甲 人工智能學習睇穿照騙
透過人工智能學習改圖方法,成功令系統懂得拆除 PS 裝甲。

UC Berkeley 同埋 Adobe 嘅研究團隊唔知係咪有人伏已中,先會開展研究用人工智能拆解 PS 裝甲。佢哋首先用 PS 將一啲人像相進行微調,例如瘦面、挺鼻、整大對眼、執靚個笑容等等,然後指示人工智能將呢一堆 PS 人像相同原裝相進行比較,等 AI 學習分析啲相通常會點執,令系統學習點樣施展「還原靚靚拳」,拆除相片嘅裝甲。結果發現,人工智能喺照妖鏡嘅能力上準確度達 99 %,而且亦可以根據預測,提供一鍵還原功能,效果令人非常滿意。

當然,UC Berkeley 同埋 Adobe 嘅研究團隊並唔係真係為咗拆除 PS 裝甲先有呢個研究,而係希望呢個研究可以用喺數碼搜證方面,協助相關人士分辨罪犯用假相嚟進行瞞騙。另外,呢個研究亦有限制,暫時只可以分辨經 PhotoShop 處理嘅相,要拆除其他美圖 app 嘅裝甲就仲未得住喇。

資料來源:https://bit.ly/2ZlfQIKhttps://bit.ly/2IHYxe8

相關文章:【AI 照騙】Nvidia GauGAN 繪圖神器 唔自然畫出自然相