IT業界資訊媒體

【退休宣言】SaaS 成功個案? GandCrab 開發者兩年賺 3 億美元服務費

害人無數嘅 GandCrab 勒索軟件,由 2018 年 1 月出現至今,據開發嘅黑客組織所講,已經成功賺咗 20 億元贖款,而佢哋亦成功證明咗壞事做盡但唔會有報應、一年賺到一世人嘅使費,所以正式宣佈退休喇!作為一個 SaaS 供應商,你話係咪好「勵志」呢!

囂張退休

勒索軟件 GandCrab 係由黑客組織所開發,至今已被發現推出過 5 個版本。佢哋提供嘅服務只係 SaaS(Software as a Service) ,即係軟件供應商,將勒索軟件賣俾其他人用,自己只係收取三至四成贖金作為服務費,而唔會直接勒索目標人物。

早兩日,黑客組織突然喺討論區上發表「退休宣言」,喺宣言入面,佢哋指出 GandCrab 已經成功為所有客戶賺咗 20 億美元贖款,而佢哋每年亦收到1.5 億美元服務費,話年半已經賺夠,所以決定「掛 Keyboard」退出江湖,為事件劃上一個句號咁話。

點解有退休呢個決定?除咗賺夠生活費,喺宣言入面亦有講到原因,首先係佢哋證明咗做壞事唔一定會有報應,其次就係佢哋亦證明自己成為咗第一,而且唔係自吹自擂,而係通過其他人嘅肯定,內容相當囂張。

 

開發 GandCrab 嘅黑客組織早兩日喺討論區刊登嘅「退休宣言」,講到明 20 日後退休,內容真係非常惹火。

 

SaaS 20 日後終止服務

而隨住呢個退休宣言,黑客組織亦講明跟住落嚟會採取嘅行動,話唔再會為客戶提供服務,通知佢哋唔好再發動攻擊,同時喺 20 日限期內無論用乜嘢方法都要收取贖款。另一方面,佢哋亦警告中招者要喺呢 20 日內俾贖款,否則佢哋將會刪除解密鎖鑰,被加密嘅檔案將會永遠被鎖。

呢個消息都嚟得幾突然,如果有追開我哋嘅報導,應該都仲記得喺三月黑客組織先刊登招聘廣告,希望搵到精於遠程控制電腦或企業網絡滲透嘅專家加入,仲話「唔好錯失改善人生嘅美好機會」添!到底佢哋係咪真係可以安享美好人生,抑或只係時辰未到?相信好多人都會食住花生等睇戲。

資料來源:https://bit.ly/2QEGU2s