IT業界資訊媒體

【賣藝唔賣身】Google 員工怒捉蜻蜒

自從上年初 Google 被美國網上媒體 Intercept 揭發為咗重返中國市場,而正在研發高彈性可融合審查國策嘅納米式過濾型搜尋引擎後,即時引來公司員工嘅抗議,1400 個員工更喺 8 月聯署要求 Google 停止繼續開發呢個代號為蜻蜓(Dragonfly)嘅計劃。原因好簡單,因為好多 Google 員工都係熱愛公司嘅自由平等文化,先至為 Google 效力,埋首研究改善人類生活。但而家竟然為咗龐大嘅市場而彎腰,自然惹來激烈反彈。Google 管理層最後喺上年 12 月叫停計劃,並將負責嘅工程師調配去巴西、印尼等國家嘅其他研究項目,表面上似乎平息咗民憤。

不過,醒目嘅 Google 員工就無放棄過「捉蜻蜓」行動,竟然喺內部系統內發現蜻蜓計劃下兩個手機應用程式「茅台」(Maotai)及「龍飛」(Longfei)嘅程式碼竟然喺今年一、二月繼續被更新,次數更達 400 次之上,而且喺公司預算文件內發現仍撥咗 100 個員工嘅 budget 俾蜻蜓計劃,顯示蜻蜓仍在繼續成長。現時 Google 管理層仍未就事件作出回應,但其實上年叫停蜻蜓但又唔肯直接回應係咪永不推出過濾型搜尋器時,瞹昧態度已令唔少工程師不滿,陸續有員工甚至高級職員劈炮。如果要繼續保住 Google 自由平等嘅形象,睇嚟今次管理層都唔可以 hea 應了事。

資料來源:https://bit.ly/2EuQRJZ