IT業界資訊媒體

【請廣傳】立即移除Android版CamScanner

成日話免費軟件唔係免費,原因就係咁,因為你喺用嘅同時,其實係付出緊某啲代價,例如要睇廣告、喺社交平台分享資訊等等,更嚴重嘅代價,就係有可能被黑客入侵,盜取個人私隱,Android免費版本嘅應用軟件 CamScanner 就係最佳例子。

CamScanner 第三方供應商偷藏後門

CamScanner 係一隻可以將影相製作 PDF 嘅應用軟件,由於好方便用嚟製作電子書,所以係一隻大受歡迎嘅 app,單係 Android 版本嘅下載量已破億,雖然免費版會有水印,亦唔支援 OCR,但都唔影響佢嘅受歡迎程式。不過,Kaspersky 網絡安全專家發現 Android 版 CamScanner 內藏後門,可以俾黑客暗中遙距安裝惡意軟件,盜取個人私隱或進行網上購物。

Kaspersky 專家話首先發現 CamScanner 有問題嘅人係用家,喺幾個月前開始,開始有用家喺 Play Store 上投訴應用軟件有古怪行為。經調查後,專家發現後門唔係嚟自開發嘅公司,而係同佢哋合作嘅廣告供應商。透過 CamScanner 應用軟件內嘅廣告供應模組,黑客可以遙距喺 Android 裝置上下載及安裝惡意程式,而專家話呢個模組之前亦被發現存在喺某啲國產智能手機嘅預裝軟件內。由於存在重大風險,所以專家就建議最好立即移除 CamScanner。至於付費版本由於唔存在廣告播放,所以就唔受今次事件所影響。

所以話,免費軟件並唔係免費,招致嘅損失隨時比所收費用更大。專家話雖然 Google 近年已積極掃除 Play Store 商店內嘅問題 app,但點都無可能完全堵截佢哋上架。專家教路,無論隻 app 幾受歡迎都好,安裝前一定要睇留言,有問題實有人投訴,如果連留言都未有,就最好唔好搶先試用喇。

資料來源:https://bit.ly/30E1zI7

相關文章:【植入式廣告】Agent Smith 廿一世紀插人網絡 2500萬手機幫手搵錢

 

Privacy Preference Center