IT業界資訊媒體

【萬能 Google】尼日利亞男執 SIM  卡偷錢被拉 網上自學仲話係常識

智能手機而家已經可以處理到好多金融轉帳,所以用家都會為手機加上密碼或生物認證,例如指紋、人臉解鎖等,就算俾人偷走都唔驚。原來 SIM 卡都需要好好鎖定,因為視乎唔同地區,SIM 卡可以做到嘅理財功能都有分別,好似喺尼日利亞,流動網絡用家就可以透過 SIM 卡嚟轉帳,俾人偷到張曾經用嚟過戶嘅 SIM 卡,就可以轉走晒銀行啲錢。

早前一個住喺尼日利亞 Idi-Oro 地區 嘅31 歲男子 Oladimeji,佢就因為偷用人哋嘅 SIM 卡轉帳被捕。呢個疑犯喺被訪時透露,佢曾經去過杜拜踢兩年職業足球,完咗合約就捧住 700 萬奈拉(折合港幣約 15 萬)歸國,諗住同拍檔做生意賺錢,點知拍檔拎咗 500 萬奈拉後突然死咗,搞到佢陷入財困。為咗唔想做刼匪,於是佢就唯有上網研究有乜賺錢方法。

SIM 卡二次搵錢

Oladimeji 最後研究到嘅賺錢方法,就係執小偷丟掉嘅 SIM 卡。佢話小偷偷咗電話後,通常都會掹走張卡拎去賣;而佢就會執走呢張 SIM 卡進行二次搵銀。Oladimeji 話好多人以為手機啟動咗密碼保護,就唔使驚俾賊人偷錢,咁諗法的確唔錯得晒,但佢只要拎張 SIM 卡插入智能電話以外嘅手機,就可以喺 keypad 輸入特定通行碼,讀取 SIM 卡曾經接觸過嘅銀行名稱。確定邊間銀行後,佢再輸入相關嘅銀行增值代碼如 *37*100#,就會睇到用家嘅銀行帳戶仲有無存款,之後就可以再決定㩒幾多錢咁話。

呢種偷錢方法原來唔難學,Oladimeji 話佢都係喺 Google 搵同學,仲話係 common sense 嚟添。雖然香港銀行無呢項服務,但其實如果係用 SIM 卡收雙重驗證碼嚟登入銀行帳戶,咁賊人一樣可以透過 SIM 卡偷錢。計我話最好都係 Lock 埋張 SIM 卡穩陣,Android 手機可以喺設定嘅安全性項目內搵到, iPhone 用家就可以去流動網絡設定入面搵,做多一重保障。

資料來源:https://bit.ly/2EYWuRG

相關文章:【獨家專訪】加密貨幣助攻 勒索軟件乘機肆虐