IT業界資訊媒體

【自由機財路】藏身香港黑客送美受審 賄賂AT&T職員解鎖賺錢

為咗吸引客戶上台,流動網絡商都會提供各種手機優惠上台計劃,只要客戶簽訂一年或以上合約,就可以超平價錢買手機。回想 iPhone 好炒得嘅年代,就有唔少人會上台後賣走 iPhone,賺取嘅差價就夠俾一年或以上嘅月費,可以大慳網絡費。不過,喺美國就唔係好 work,因為上台客戶除咗要簽約,就連手機都有 SIM lock,客戶必須插住網絡商嘅 SIM 卡先用得,變相限制咗 iPhone 嘅易手價值。不過,要解鎖都唔係無辦法,其實網絡商可以喺系統做嘢,只要取消系統上 iPhone 嘅 IMEI 登記,呢部手機就可以用到其他網絡商嘅 SIM 卡。

100萬美元解鎖賄款

財路就係咁出現喇,一個巴基斯坦黑客 Muhammad Fahd 自從 2012 年開始,透過賄賂美國 AT&T 員工,等佢可以幫手解除 AT&T 上台出嘅手機 SIM lock。當有客戶想解鎖,Fahd 就會將佢部機嘅 IMEI 傳送俾受賄員工,員工就係公司系統上做手腳,過程非常簡單及隱密,甚至做咗 5 年 Fahd 先俾人發現。據美國司法部所講,5 年間 Fahd 總共協助破解 200 萬部手機,佢亦先後拎咗 100 萬美元出嚟俾三個受賄員工。據講 Fahd 搜尋目標人物嘅方法,只係通過打電話同 Facebook Messanger,仲教埋佢哋開公司嚟收錢,單單係其中一個已收咗 42 萬,咁大吸引力,難怪陸續有員工受賄。

不過,Fahd 並唔係單單搵人解手機鎖就算,佢仲賄賂員工喺 AT&T 系統上安裝惡意軟件,又喺公司大樓內安裝暗黑 router 同埋無線熱點,進一步暗中搜集公司嘅機密資料,同時令到佢可以喺 AT&T 嘅網絡內出入,連解鎖都可以自己做埋。

最後呢位巴基斯坦黑客喺上年 2 月落網,不過佢匿藏嘅地點原來喺香港,直至今個月 2 號先被引渡返美國受審。Fahd 將要面對一連串嘅起訴,最高刑罰高達 20 年。至於 AT&T 方面,就第一時間衝出嚟話今次嘅事件並無造成任何客戶資料嘅損失,同埋亦無影響到客戶嘅私隱,唔知啲客戶信唔信呢?

資料來源:https://bit.ly/2KkMCEY

相關文章:【萬能 Google】尼日利亞男執 SIM  卡偷錢被拉 網上自學仲話係常識