IT業界資訊媒體

【自掘墳墓?】「未完成」 Windows 10 更新檔唔裝好過裝

作業系統或應用軟件開發商,久唔久都會推出更新檔俾用家去 update 系統,目的離不開加入新功能、修復新發現嘅漏洞或不穩定性,提升用家體驗。不過,之前 Microsoft 嘅更新檔已經試過拖慢用家嘅電腦、同防毒軟件相冲等問題,而喺嚟緊 5 月 10 日為 Windows 10 推出系統更新,今次更預先講明話係照顧唔到某啲 Windows 10 嘅用家⋯⋯究竟呢個更新檔完成咗未㗎?

位址大改動

今次 Microsoft 之所以咁大細超, 睇完個原因之後真係笑到有腹肌。 Windows 10 更新檔嘅支援對象,係唔包括電腦插有外置硬碟、USB Drive,又或 SD 讀卡器內有卡插住嘅用家,原因係喺更新過程中,呢啲裝置嘅 Drive 位址會被改動,例如原本係 D Drive,就會被編排為 E Drive。呢啲改動嘅影響的確可以好大,例如某啲軟件係安裝咗喺外置硬碟的話,更新後因為路徑被改動, Windows 10 就會出現讀取位址出錯等等嘅問題,隨時炒機,或引發其他更嚴重嘅問題。為咗減少呢啲悲劇發生,所以當 Windows 10 偵測到電腦仲插住呢啲外置裝備,就唔會俾電腦進行自動更新,直至到「問題」得到解決,先識得自動執行。

除咗外置裝備嘅 Drive 位址會被改動, Microsoft 亦補充一句話唔單只外置裝備會被改動,就連內置硬碟都有可能出現問題!嘩咁點先?好多軟件都係裝喺內置硬碟入面喎,改動路徑咪連軟件都開唔到? Boot 機嗰陣搵唔搵得到啲開機設定㗎?真係有好大風險喎!最唔明就係既然有咁大疑問,點解 Microsoft 都要夾硬推出更新檔呢?未提升到用家體驗前,已經嚴重令商譽受損。

雖然我哋成日都建議大家要第一時間更新系統,但今次都要破一破例,不如閂咗 Windows 10 嘅自動更新先,睇定啲先好 update 呀。最後都係要重提劉華至理名言喇,「今時今日,咁嘅服務態度係唔夠㗎!」

資料來源:https://bit.ly/2W3404M

相關文章:【角逐漏洞王】Windows 又又又出現零日漏洞