IT業界資訊媒體

【美顏App有毒!】小心天使背後暗藏醜陋

能夠化腐朽為神奇嘅美顏 App 絕對係女生自拍必備,逐漸美白又得,立即美白又得,不過,原來天使背後暗藏魔鬼,Trend Micro 近日公布,有數十款提供美顏或濾鏡功能嘅 Android 美顏 App 可以連結遠端廣告配置伺服器,藉此傳送惡意或詐騙廣告,甚至竊取用戶照片,當中有不少受歡迎美顏 App,下載數量超過100萬。

Trend Micro 列出的數十款有問題嘅美顏 App 之中,Pro Camera BeautyCartoon Art Photo Emoji Camera 嘅下載數量超過 100 萬,而 Artistic effect Filter 嘅下載數量超過 30 萬,另外超過 10 萬嘅包括 Art EditorSelfie Camera ProSuper CameraArt Effects for PhotoBeauty CameraHorizon Beauty CameraAwesome Cartoon Art 等。

部份程式於下載後會立即隱藏,因此難以於程式列表找到及刪除,程式亦能利用打包方法避過分析。每當用戶解鎖手機,程式就會傳送全螢幕廣告,當中包括惡意廣告以及色情播放器廣告。更慘嘅係,點擊色情播放器廣告就立即收費,最最最慘嘅係,個播放器係冇嘢播放嘅;另外亦有惡意廣告將用戶導向釣魚網站以盜取用戶個人資料。而大部份情況下,用戶係無從辨識廣告來源嘅。

另外,Trend Micro 調查咗一批濾鏡程式,發現有部份程式誘導用家將照片上傳至伺服器以進行「執相」,然而,回傳之照片附帶一個假更新提示(有 9 種語言)。Trend Micro 表示,程式作者有機會收集用戶上傳嘅照片,然後用於社交媒體來開假帳號。

Google 已將程式從 Google Play Store 移除,建議大家下載應用程式之前要先研究一下,例如睇睇用家嘅 Comment 及評分。

資料來源:http://bit.ly/2DKwj0S