IT業界資訊媒體

【罰1.8億英鎊】洩38萬客人資料 英航罰款破晒記錄

老闆成日同我講,公司budget好緊架,應慳則慳啦,IT嘅嘢夠用就得啦,唔好出大穫嘢就得架喇。於是尋日開會我就索性拎咗單新聞俾佢睇,佢睇完就即刻轉晒軚,話一間公司嘅網絡保安其實好緊要架,仲即時批咗大筆錢落嚟添置新器材。

乜嘢新聞咁巴閉?咪就係英航俾人判罰天價罰款囉!事緣舊年9月,英航俾一個名為Magecart嘅黑客組織睇中,佢哋一向玩慣card skimmer呢個數碼版信用卡讀取器程式,於是搵方法拎到英航網頁嘅登入權限,再將card skimmer script 植入俾錢買機票嘅網頁,結果成功喺舊年821號到95號期間,偷走約38萬客戶嘅名字、電郵地址、信用卡等資料,詳細案情可以睇番我哋舊文(https://bit.ly/2CPy0f7 )。

經過一輪調查之後,英國資訊專員辦公室(ICO)早兩日就決定向英航罰款1.8億英鎊,係ICO歴來開出最大額罰款,差唔多係英航2017財政年度全球營業額嘅1.5%,諗起都好肉赤!英航行政總裁Alex Cruz當然立即出嚟呼冤,話對ICO嘅決定感到驚訝和失望,英航對偷取客戶資料嘅犯罪行為作出快速反應,並未發現與盜竊相關嘅賬戶存在欺詐行為嘅證據……咁佢哋仲有28日上訴期嘅,或者可以減到罰款都未定。

可能大家會問,點解今次判得咁甘?之前FacebookYahooEquifax發生嘅事故仲大單啦,點解都係罰50萬英鎊就搞掂?原來係因為舊年5月歐盟通過新私隱條例《一般資料保護規則(GDPR)》之後,加重咗罰則,最高罰款可以去到全球營業額嘅4%,所以今次英航其實係未去到最高罰款嘅,但撞正事件喺GDPR通過之後先發生就冇法子啦,但亦都俾到教訓各大小企業嘅老闆們,唔好睇少保護客人資料呢樣嘢,唔係分分鐘賺埋都唔夠交罰款!

相關文章:【謎底已經解開!】英航資料洩露案真相大白?