IT業界資訊媒體

【網外懲】 無人機轟炸 網戰部隊 以色列軍事行動回應網絡攻擊

講到明網絡攻擊,當然係指發生喺網絡上嘅攻擊。不過,以色列軍方上星期六喺截斷巴勒斯坦武裝組織哈馬斯嘅網絡攻擊之餘,仲出動埋無人機轟炸 網戰部隊 藏身嘅大廈,實行喺網絡外打擊敵對勢力。

空襲 網戰部隊 大本營

國家政府喺對付黑客攻擊嘅時候,通常都係採用截斷攻擊手段,或好似日本政府咁,編寫防禦性質嘅惡意軟件,有需要時作出反擊,好少情況會好似以色列軍方咁,以實際軍事行動回應。事實上,今次亦係以色列軍方首次就住網絡攻擊發動武力還擊,有關今次空襲嘅原因,以色列軍方並無詳細透露內容,只係話巴勒斯坦武裝組織哈馬斯嘅黑客部隊匿藏喺大樓內,不斷向以色列政府發動網絡攻擊。雖然軍方已經阻止咗黑客嘅攻擊,但同時間亦決定即時出動無人機,轟炸哈馬斯網戰部隊喺加沙地區嘅藏身之處,網外網內全面瓦解對方嘅網戰能力,同以往喺遇襲後經過多月部署再行動嘅手法有好大嘅分別。

【網外懲】 無人機轟炸 網戰部隊 以色列軍事行動回應網絡攻擊
以色列軍方喺 Twitter 上公開今次派遣無人機轟炸哈馬斯 網戰部隊 總部嘅經過。

對於網絡戰爭,其實北約(NATO)早喺三年前已正式將佢定義為現代軍事戰爭嘅戰場,係繼海陸空後第四大戰場,戰略上佔有重要嘅地位;雖然社會上普遍都知道網絡攻擊嘅嚴重性,不過甚少有實際上嘅軍事還擊。要數例子,美國就曾經喺 2015 年率先以無人機空襲伊斯蘭國嘅網戰組織,以阻止其領導人 Junaid Hussain 通過 Twitter 洩露美國士兵嘅個人資訊,不過,呢個暗殺行動亦唔係即時還擊嚟。

史上首例爭議

到底幾時先至應該發動武力還擊?獨立網絡安全專家 Lukasz Olejnik 就認為始終唔應該用嚟作為第一線嘅還擊手段,因為網絡攻擊嘅破壞力相對較細;另外亦有其他專家指出黑客手無寸鐵,只係戰爭嘅後勤支援,所以唔應該攻擊佢哋。不過,呢種講法算唔算過於低估黑客嘅能力呢?事關今時今日嘅網絡攻擊,已可以造成電網斷電、核電設施損毀,甚至乎哈馬斯網戰部隊亦曾多次成攻騎劫以色列軍方嘅無人機,所以論破壞力真係唔講得笑,可以造成人命傷亡㗎。至於今次事件最大爭議嘅其中一個地方,就係算唔算史上首宗為咗網絡攻擊而即時以實際軍事行動還拖嘅案例,因為哈馬斯方面喺上星期五首先發動導彈襲擊以色列,造成幾十人死亡,以色列軍方亦即時採取報復式轟炸,所以唔算係獨立事件囉。

資料來源:https://bit.ly/2J3dDNQ

相關文章:【以色列 Unit 8200】全宇宙最勁網絡專家喺呢度