IT業界社群及資訊平台

【網上課堂好難頂?】16歲學生 DDoS 低軌道離子炮轟炸校園網絡

為咗唔使上堂,你可以去到幾盡呢?美國佛羅里達州一間社區高校,喺新學年開始無耐,遭受廿幾次網絡攻擊,當中至少有 8 次,竟然出自同校一位學生之手,呢個攻擊名為低軌道離子炮,淨係聽個名都俾佢嚇親啦!

低軌道離子炮 (Low Orbit Ion Cannon, LOIC) 聽落好似好勁,但其實真身只係一款開源網絡測試工具,不過由於可以製造大量隨機網站訪問,所以確實係 DDoS 攻擊好幫手。好似大名鼎鼎嘅黑客集團 Anonymous 就係十幾年前利用 LOIC 攻擊 Visa、Master 及 PayPal 等金融機構。

今次呢個 16 歲學生,就唔知透過乜嘢渠道搵到呢件開源武器,向社區網絡發動攻擊,癱瘓網絡運作,搞到學校嘅網上課堂要連續停課三日。而美國警方喺追查呢 8 宗密集式攻擊期間,雖然發現攻擊者嘅 IP 來源自中國、烏克蘭同俄羅斯,不過最終都搵到源頭係嚟自社區內一個青少年,上門調查確認後,就沒收咗佢部電腦同家庭遊戲機,後者雖然未必同攻擊有直接關係,但就可能係呢個學生同其他黑客聯繫嘅工具嚟。玩到咁大,警方自然唔會咁輕易警誡了事,學生正面臨使用電腦進行詐騙行為及干擾教育服務等罪名,稍後將由州法院審理。

其實除咗自己出手,DDoS-as-a-Service 或其他代客發動網絡攻擊嘅服務,喺暗網上真係好易搵到,不過喺聘用呢啲服務前,真係要諗吓後果,同埋隨時會俾聘用嘅黑客要脅,愈做愈錯!

 

資料來源:https://bit.ly/33drkS2

唔想錯過熱門網絡保安消息,請即訂閱 wepro180 電子周報:https://bit.ly/2ZcCi9J

Privacy Preference Center