IT業界資訊媒體

【矛盾對決】Adobe照妖鏡 Project Face粉碎PS裝甲

雖然而家唔少影相 app 已具備美圖功能,不過,講到執相或 P 圖,就點都要數 Adobe Photoshop 係一哥。Adobe 剛啱舉辦 Adobe MAX 2019,唔單只公布推出 iPad 版 Photoshop 及 Illustrator 嘅消息,亦展示咗一啲開發中嘅應用技術,例如 Adobe Photoshop Camera,以及呢個拆穿照騙嘅 Project About Face 技術。

講到照騙,相信唔少人都深受其害,因為你喺網上認識嘅人,永遠同出嚟嗰個唔多似樣,「網上范冰冰,現實小喇星」、「IG男神,見人驚暈」,呢啲真實個案真係數都數唔晒。特別係以前都仲話要自己執相,但而家就完全自動化,老實講真係無乜方法防避。Adobe 嘅 Project About Face 技術,正正可以幫下大家手,利用人工智能技術「聞相」,睇吓有無造假嘅地方。

睇片可見,Project About Face 技術係透過分析相片嘅 pixel 有無機會被改動,去判斷執相嘅機率。負責呢個 Project 嘅 Richard Zhang 指出,如果執過張相,例如變大對眼、瘦面、推高個鼻,一定會涉及拉鬆或壓縮相對位置嘅像素,於是只要訓練系統搵出呢啲肉眼未必發現到嘅細微改動,就可以判斷張相有無執過。示範嗰陣,Richard 一㩒 Heatmap 功能,系統更會顯示邊個位有可能被改動,而且仲可以試圖「還原」真樣,都真係幾神奇㗎。

【矛盾對決】Adobe照妖鏡 Project Face粉碎PS裝甲
系統更會顯示邊個位有可能被改動,而且仲可以試圖「還原」真樣,都真係幾神奇㗎。

不過,因為 Project About Face 係搜尋像素有可能被改動嘅地方,所以如果相入面嘅人係電腦 rend 出嚟,由於一開始已係咁,所以就唔會捉到任何破綻,打假不能,但起碼都幫你捉到一堆 P 圖獸獸出嚟先丫。

資料來源:https://bit.ly/32lGB0v

相關文章:【AI 照騙】Nvidia GauGAN 繪圖神器 唔自然畫出自然相