IT業界資訊媒體

【睇住嚟打】Apple平反iOS漏洞殺傷力 兩個月內專攻維吾爾族

要俾獎金之餘,仲要俾人四圍話唱旗下產品有漏洞,最慘嗰個仲係死對頭,唔火就假。Apple 終於忍唔住發聲,個漏洞主要針對維吾爾族人攻擊!

Google Project Zero 呢期巧威威,一口氣搵出 Apple 14 個 iOS 系統漏洞,部分更加係超級漏洞,一睇被加料網站就中招,將系統嘅最高權限拱手讓俾黑客,裝置內嘅所有檔案都可隨意拎走,甚至睇埋 WhatsApp、Telegram 嘅訊息,一時之間公眾對 Apple 嘅信任度大插水。

面對住 Android 系統開發商嘅報告,Apple 罕有咁發聲明回應,內容首先就話 Google 所指嘅問題,其實早喺今年二月已經解決咗,但因為 Google 方面隔咗 6 個月再提起,製造咗個假像出嚟,令人以為大規模監控私隱嘅事係最近發生,搞到唔少蘋果用家表示擔憂,所以先走出嚟澄清。其次係其中一個睇網站就會出事嘅漏洞,並唔係好似 Project Zero 所講咁廣泛,因為有問題嘅網站主要同維吾爾族組織有關,而且亦只係持續咗兩個月而唔係兩年,絕對無 Google Project Zero 所指咁持久。

Apple 喺聲明最後仲話佢哋深明網絡安全係一個無終點嘅旅程,但佢哋就會一直堅持守護用家嘅安全。唔知 Apple 遲下又會唔會成立一個特別團伍,專門挖掘人哋嘅漏洞?

資料來源:https://apple.co/2k8PdI4

相關文章:【即查iOS12.1.4以下嚴重漏洞WhatsAppTelegram加密訊息都睇到