IT業界資訊媒體

【玩穿越】日內瓦車展 2019 定位錯晒

瑞士日內瓦車展(Geneva International Motor Show2019 進行得如火如荼,各大車廠嘅底牌已揭,成為車迷茶餘飯後好話題。不過,今屆車展仲有花生食,因為當中 7 間車廠展出備有 GPS 全球定位系統嘅新車時,定位資訊竟然被竄改,令啲車嘅位置由瑞士日內瓦飛到去英國 Buckingham,系統時間更穿越時空去到 2036 年!需知道定位系統對架車非常重要,尤其係未來嘅自動導航,咁容易被 hack,消費者仲點會對呢啲車廠有信心呢?難怪車廠即時向大會投訴,要求佢哋快速解決問題。

GPS 定位被竄改

據稱受影響嘅車廠包括 AudiPeugeotRenaultRolls-RoyceVolkswagenDaimler-Benz 同埋 BMW,車展嘅主辦單位懷疑有人喺會場內廣播虛假衛星訊號,誤導車身 GPS 器材作出錯誤判斷。今次擬似黑客攻擊更牽連埋另一間英國模擬衛星訊號產品嘅公司 Racelogic,因為虛假嘅定位地址就係佢哋嘅總部,當事人自然急急衝出嚟澄清唔係佢哋搞鬼,更話佢哋嘅器材只可以影響 20 米直徑範圍內嘅裝置,要做到今次覆蓋幾個會場嘅攻擊,就必須將訊號增幅。

直至現時為止都未有組織承認今次攻擊,唔知今次係咪黑客純粹用嚟測試廣播虛假衛星定位資訊嘅測試。不過既然俾佢哋成功咗,衛星定位產品供應商真係要諗諗點樣防禦,否則就唔係顯示錯地方或時間咁簡單。

資料來源:bit.ly/2VRGnLY