IT業界資訊媒體

【物聯網漏洞】打印機最易中招

個個人都話買 IoTInternet of Things, 物聯網),你估真係個個人都識用 IoT 咩?

防毒軟件公司 Avast 最新公佈嘅 Smart Home Security Report 2019 調查顯示,喺全球家庭中,擁有 5 部或以上 IoT 物聯網產品嘅家庭達 40.3% ;不過,同時間亦有 40.8% 嘅小家庭擁有一部或以上存有保安漏洞嘅物聯網產品,反映黑客可以輕易通過呢啲漏洞入侵目標家庭嘅內聯網,從而控制其他設備或盜取私隱。

至於喺咁多種物聯網產品之中,擁有最多漏洞嘅產品係邊種呢?原來就係打印機!喺今次調查嘅 21 個國家之中,打印機嘅排名都保持喺三甲位置,證明相當多用家都忽視咗佢嘅保安重要性。唔係講笑,上年 12 月就曾發生過打印機集體被 hack 事件,有粉絲為咗幫 YouTuber 紅人 PewDiePie 爭奪最受歡迎 YouTube 頻道,就利用漏洞遙控全球 5 萬打印機 print 出告急字句,要求大家一齊訂閱 PewDiePie 頻道。

造成呢啲物聯網產品漏洞嘅原因有好多,第一位就係弱弱嘅連接密碼設定,其次就係產品嘅軟件本身存有漏洞,而用家又無為產品進行韌體更新。幾時都話,無論有幾完美嘅網絡保安技術都好,只要用家疏忽或輕視佢嘅重要性,就點完美都無用啦!

資料來源:https://bit.ly/2Ns2ju2