IT業界資訊媒體

【無限loop】被制裁國告急 靠黑客補國庫再升級武器

美國因為各種政治、經濟問題,先後將多國列入經濟制裁名單,除咗禁止採購對方嘅產品,亦向對方出口美國嘅產品加征關稅。不過,最近美國 FBI 一位網絡安全部門發言人 Richard Jacobs 就指出,制裁令嘅影響就係導致針對勒索或詐騙嘅網絡攻擊大增,目的就係填補因經濟制裁引致嘅損失,再支持黑客提升武器,形成不良嘅惡性循環。

Jacobs指出,調查顯示發動攻擊嘅黑客,大部分同被制裁國家有密切關係,雖然呢啲黑客主要來自四大國家,包括俄羅斯、伊朗、北韓及中國,但情報顯示正有擴大跡象,例如南美、中東及東南亞國家。被制裁國出動國家級黑客向美國企業進行各種攻擊,雖然仲有盜取科技、商業秘密為目的嘅個案,但針對金錢嘅攻擊就特別多,黑客會將所得嘅贖金及詐騙返嚟嘅金錢填補國庫,令被制裁國有錢可用,同時國家亦會支援黑客升級裝備,以發動更精密嘅攻擊。佢以最近一宗 9.5 千萬美元嘅轉帳詐騙為例,雖然大家都會恥笑受害人點可能靠一個電話及電郵,就相信對方真係上司而轉錢,但 Jacobs 話實際情況係呢啲騙案通常經過四個步驟以上,去搏取對方信任,稍為留神都有可能上當。

對於懷疑被騙或勒索嘅公司,Jacobs 話如果可以喺 48 小時內向 FBI 求助,都仲有機會制止轉帳或攞得返啲錢,但一過咗呢個大限,大家就唔使旨意仲可以攞得返。好似上述嘅個案,FBI 就幫受害公司截停咗 7 千萬美元,大大減少到損失。銀行業方面亦對情況表示擔憂,因為每次成功攻擊,造成嘅金錢損失高達一億美元,足以令被制裁國投入更多資源去扶植黑客為國家搵錢。

講咗咁耐,其實 Jacobs 都係想帶出一點,就係希望受害人唔好俾贖金或儘快求助,因為咁樣只會助長黑客升級,而且佢亦警告企業唔好交贖金,原因係企業有可能要負上法律責任,一旦轉帳戶口係屬於恐怖份子,俾贖金亦有可能涉及支援對方。雖然暫時美國政府暫時都未有澄清究竟算唔算犯法,但講到尾大家都係要提高警覺,同埋做好備份手續,就算中咗勒索軟件,都唔使交贖金啦。

資料來源:https://bit.ly/3737SbD

相關文章:【特赦犯案黑客】法官話:正面有太多貢獻