IT業界資訊媒體

【激光好危險】Amazon Alexa同Google Home唔好擺近窗邊

我想買 Google Home 好耐,你諗下喺屋企嗌聲「OK Google」,佢就自動幫你做嘢,幾咁智能幾咁型!可惜佢一直冇喺香港出行貨,後來有朋友買咗水貨,先發現原來好多功能香港都用唔到,聽完之後就打消咗買佢嘅念頭,跟手睇埋呢單新聞,就更加唔敢買住!

話說日本電氣通訊大學同美國密芝根大學嘅幾位教授,最近公布咗新嘅研究結果,發現好似 Google Home 同埋 Amazon Alexa 呢類用語音操控嘅智能家居裝置,竟然存在極大保安漏洞,就係如果透過儀器將激光光束轉為電子訊號,然後射向呢類裝置嘅收音咪,就可以令支咪以為接收緊聲音;只要不停改變激光嘅強度,就會變到好似打緊摩斯密碼咁,發出語音指令,成功遙距控制部裝置執行指令。

大家最關心嘅,就梗係要隔幾遠先有效啦。研究團隊試過將 Google Home 裝置放喺窗邊,然後喺相隔約  230  呎外嘅大廈內,用激光發出「OK Google, open the garage door」指令,結果真係令 Google Home開啟車房度閘!咁 Google Home 唔係淨係負責開門㗎嘛,佢仲可以上網買嘢、開關家電,甚至開大門門鎖都關佢事,所以後果真係不堪設想!最令人擔心係以上做法並唔複雜,喺街邊買支鐳射筆,再加多聚焦鏡已經搞掂,你一定俾得起!

研究團隊亦都試過用激光射落 Android 手機同埋 iPhone,睇下會唔會一樣遙控到,好在結論係要好近距離先至做到,無 Google Home 同埋 Amazon Alexa 咁大件事。專家話解決方法,最好都係幫呢類裝置加密,例如要講某句暗號先可以落指令,當然最佳方法係唔好擺窗邊,有咁埋收咁埋就最安全!

資料來源:https://bit.ly/2NLAFJ7

相關文章:【竊聽風暴】Google、Amazon智能喇叭偷錄密碼

 

Privacy Preference Center