IT業界資訊媒體

【江湖扼殺令】特朗普宣布進入「全國緊急狀態」

中美貿易戰火終於殺埋身,美國總統特朗普剛剛簽署行政命令,宣布進入「全國緊急狀態」,禁止美國企業使用對國家安全構成風險嘅企業所生產嘅電信設備,以保護受威脅嘅美國通訊行業。好明顯,矛頭直指中國。

早前侵侵已經勒令禁止政府機構、聯邦機構使用華為產品,而今次嘅「江湖扼殺令」,將賦予商務部長羅斯(Wilbur Ross)及聯邦機構更大權力去左右美國企業嘅商業行動,例如禁止美國公司使用構成國家安全風險嘅電訊設備。美國司法部一直指控華為、中興通訊等中國電訊企業同中國政府間諜活動有聯繫,所以中國嘅通訊科技企業都肯定冇運行。

緊急狀態主打華為

現時,美國商務部有 150 日時間,去列出一個「黑名單」制定實施計劃。外界相信,行政命令嘅目的係為禁止美企與華為有業務往來,而華為於 5 月 16 日亦作出回應:「華為是5G電信設備領域無可比擬的領導者,我們也願意和美國政府溝通保障產品安全的措施。如果美國限制華為,不會讓美國更安全,也不會使美國更強大,只會迫使美國使用劣質而昂貴的替代設備,在5G網絡建設中落後於其他國家,最終傷害美國企業和消費者的利益。不合理的限制也會侵犯華為的權利,引發其他嚴重的法律問題。」

美國聯邦通信委員會(Federal Communications Commission,FCC)嘅共和黨任命人員當然開心,形容特朗普發出咗一個明確嘅信息,即美國將盡所有努力去保護通信網絡。Brendan Carr 更大讚行政命令將有助於防止「外國勢力」破壞美國網絡安全或核心價值,包括免受非法監視及尊重知識產權。

「江湖扼殺令」雖然可以重擊中國,不過美國本土其實有唔少窮鄉僻壤依賴平靚正中國設備建設,行政指令就好似兩刃劍,美國自己都可能好傷。

資料來源:https://tcrn.ch/30qu8Je

相關文章:【火燒後欄】快Check!小米、華為有7款App擅自幫你開後門