IT業界資訊媒體

【武漢肺炎】專家話:恐慌情緒易中病毒

因為武漢肺炎,唔少人變咗口罩專家同網購能手,亦學識咗各種口罩嘅安全密碼、點樣利用集運避過 cut 單危機嘅知識,講真其實大家又點會想學?不過既然一罩難求,自然搞到全城人心惶惶。事實上,專家話恐慌情緒蓋過理智,普羅大眾對武漢肺炎資訊嘅渴求,亦成為咗黑客攻擊嘅缺口,中咗招都唔知乜事!

不如大家停一停諗一諗先,喺呢兩個禮拜入面,大家喺無驗證過網絡連結嘅真偽前,click 過幾多次呢啲連結嚟睇呢?好多次哩?無錯,只要見到訂購口罩、邊度有人暈咗、邊個國家封香港關呢啲標題,都幾難唔第一時間開嚟睇。IBM X-Force Threat Intelligence 安全團隊嘅專家就發現,日本地區有大量電郵攻擊,就係借武漢肺炎資訊嚟發動,電郵入面嘅 Doc 附件雖然以武漢肺炎做主題,但實際上係 Emotet 惡意軟件,一旦下載就會自動安裝,除咗可以盜竊私隱,仲有可能引入其他勒索軟件,防不勝防。專家指出,其實每年嘅新年、情人節、感恩節或有大事發生,都特別多呢啲惡意電郵出現,不過今次由於武漢肺炎疫情嚴重,恐慌情緒更易令人中招。

防毒軟件供應商 Kaspersky 專家亦指出,黑客唔止借咗 Doc 附件發動攻擊,佢哋手頭上檢測到嘅攻擊,仲會透過 PDF、MP4等其他檔案格式添。雖然今次專家發現嘅攻擊都係透過電郵發動,但大家千祈唔好忘記,釣魚攻擊已唔限於電郵,SMS、Facebook、WhatsApp、Telegram 等平台都可以睇少。如果想睇清楚疫情喺全球各地嘅感染情況,不如睇返由美國Johns Hopkins大學製作嘅疫情網站,資料係由世衞、中國疾病預防控制中心、中國國家衞生健康委員會,以及醫療業組織DXY.cn收集返嚟,再製成實時圖像化顯示介面。當有地區發現感染個案,就會用紅點來顯示;紅點愈大,代表受感染個案愈多。只要點擊紅點,就會顯示該地區的最新感染、死亡、康復出院數字。

資料來源:https://bit.ly/2UlcO7S

相關文章:【星戰終章】詐騙案的崛起!

 

Privacy Preference Center