IT業界資訊媒體

【核爆都唔用】ZAO電影變臉app 私隱任用連WeChat都驚!

講咗咁耐個人私隱有幾咁重要,特別係涉及生物特徵嘅資料千祈唔好咁易交出嚟,但原來真係唔會令大家驚㗎!玩 key 樣 app 玩到要准許對方點用你上載嘅自拍相都得?Sorry 真係無可能囉!

好多人都鍾意玩美圖、改圖 app,淨係睇下之前社交平台成日俾啲交換人樣、男變女女變男、變老變後生嘅相洗版,就知大家有幾熱衷變臉。最近有一款 key 樣 app 就係內地嘅 App Store 爆紅,呢款叫做 ZAO 嘅 app,好玩之處係只要影一張自拍相,佢就可以將你個樣 key 入一啲電影或電視嘅角色上,例如《權力遊戲》、《鐵達尼》等,而且根據 app 內指示影多幾張自拍相,出嚟嘅 deepfake 效果就會更逼真。雖然每段片唔係好長,但已足夠俾用家自 high,結果呢隻 app 喺 8 月 30 日推出,短短三日就成為國內 iOS App Store 免費排行榜嘅第一位。

騙案幫兇

好玩又免費,多人玩都正常,但問題係好多人為咗搶 Fo 或呃 Like,根本無唔睇清楚使用條款就用。原來由國內最受歡迎約會 app 開發公司陌陌推出嘅 ZAO,喺最初期版本嘅使用條款入面,係要用家答應無條件俾陌陌使用佢哋上載嘅相片或短片,可能好多人會覺得無所謂,但其實只要退一步諗一諗,你上載一張相已俾佢哋用 deepfake 技術移花接木咗去短片上,如果有心,對方絕對可以套去其他片上用嚟呃你嘅親友,而且仲係你授權俾佢哋咁用添,如果有事係咪累埋其他人呢!

當有人細讀條款之後,發現裡面藏有魔鬼細節,於是梗係鬧爆陌陌,而陌陌亦好快修改使用條款,話唔會拎用家上載嘅相或片嚟用,同時亦會剷走之前儲落嘅數據,情況一如之前俄羅斯公司開發嘅 FaceApp 一樣,要交代清楚收集得嚟嘅私隱用途。不過,個人私隱收集得咁無常識,就連 WeChat 都怕咗佢,雖然可以分享影片,但就唔俾用家喺佢哋嘅通訊平台上推薦其他用家下載,所有同 ZAO 有關嘅下載連結都 Block 晒,仲提醒用家有網絡安全風險,睇完真係得啖笑。

資料來源:https://bit.ly/2ktQJVh

相關文章:【極度恐慌】人臉、指紋特徵要死守 一遇外洩無得翻身