IT業界資訊媒體

【核武設備掘Bitcoin】工程師財迷心竅被捕

Bitcoin淘金熱有幾熱?連核武工程師都忍唔住,竟然用阿公台超級電腦去開礦!

掘Bitcoin有兩大個重要條件:強大運算能力嘅電腦,以及廉價嘅電力。唔少開礦重鎮擁有上述嘅「優勢」,例如內蒙,擁有低廉電費及空置廠房。另一個重鎮,就係俄羅斯,當地電費極平,早前俄羅斯商人Alexey Kolesnik就一口氣買咗兩座發電廠,專門用來掘Bitcoin。

咁都未算狼死,用核武設備來開礦先夠癲。

數名任職俄羅斯Russian Federal Nuclear Center嘅核武工程師,認真財迷心竅,竟然諗住利用研發中心其中一台最勁嘅超級電腦去掘Bitcoin。明明一台保安嚴密、offline嘅超級電腦,忽然online咗,阿茂都知有蠱惑啦。幾名「醒目仔」當場被捕,隨即拉咗返去聯邦安全局 (FSB)。

Russian Federal Nuclear Center (VNIIEF)為俄羅斯最大核武技術研發中心,1946年成立,於冷戰時代,VNIIEF是核軍備競賽嘅主力。VNIIEF所在地薩羅夫(Sarov)屬於高度保安區域,俄羅斯第一枚核彈正在此誕生。

2011年,VNIIEF啟動全新超級電腦,運算力達到1個PFLOPS,成為當時世上第12台最強超級電腦。

其實做得核武工程師,應該唔係白痴仔,估唔會畀Bitcoin熱潮衝昏頭腦,正所謂若要人不知…

資料來源:https://goo.gl/qD4PQC