IT業界資訊媒體

【有片】一分鐘睇盡 Apple Card 保安功能

Apple 啱啱舉行春季發布會,宣佈同投資銀行高盛合作,推出信用卡 Apple Card 。 Apple Card 有兩種,分別係鈦金屬實體卡同埋虛擬信用卡。兩張卡喺保安上都有特別功能,可以減少被盜用嘅風險。除此之外,每單消費嘅透明度仲好高,唔會只得商戶名同消費額,好易記返起到底呢單消費係咪自己碌。

實體 Apple Card 減資訊

喺實體 Apple Card 方面,卡身採用鈦金屬製作,非常襟用。而從實物可以見到,卡身只係得晶片同埋帳戶名稱,信用卡號碼、CVV保安號碼、到期日以及簽名位完全被消失,型格得嚟又夠簡約。原來 Apple 係刻意減少呢啲資訊,因為如果俾人執到呢張卡,對方都唔能夠透過卡身資料嚟偷偷哋網上購物。

虛擬 Apple Card 加密消費資料

至於虛擬 Apple Card 就會藏於 iPhone 嘅晶片入面,如果用戶要翻查信用卡號碼、CVV保安號碼、到期日等資訊,都可以喺 iOS 嘅銀包 app 入面搵得到。每次消費,亦需要配合 FaceID TouchID 先可以完成交易,唔使驚遺失電話後會俾人瘋狂盜用。為咗保持用戶嘅私隱,每次交易會以一次性動態密碼加密,確保 Apple 唔會知道你嘅消費內容,不過,高盛方面當然會知道,但 Apple 就保證對方唔會將用戶嘅資料轉讓俾第三方。

銀包 app 增消費透明度

除咗喺保安下功夫,Apple 亦喺信用卡消費介面上落足功夫,銀包 app 會詳細及圖像化地顯示每單消費嘅內容,分門別類顯示開支類別,例如水電、飲食或購買,同時亦會有詳細嘅商戶名稱及以地圖顯示消費位置,有助用戶回想起消費嘅詳情。

Apple Card 預計喺今個夏季喺美國推出,年內有機會喺 40 個地方推出。為咗吸引客戶使用,Apple 表示唔會收取年費及海外消費手續費,同時亦唔會收取遲交罰款,改為調整還款利率。另一吸引之處係現金回贈,如果利用 Apple Pay 消費將有 2% 回贈額,喺 Apple Store 購物則有 3% 回贈,不過用實體 Apple Card 就只得 1%。大家咁醒目,當然會盡量用虛擬 Apple Card 消費啦。

資料來源:https://www.apple.com/apple-card/