IT業界資訊媒體

【有得揀】99%彈出式通知被拒 下一代Firefox、Chrome為網民除害

大約四年前,Google Chrome 推出桌面通知功能,可以讓 Google 服務如 Gmail、日曆等向用戶彈出通知,讓用戶更快得知有新電郵或約會通知。後來呢項功能開放予網站所使用, 只要網站提供呢項功能,瀏覽時就會彈出通知叫網民訂閱,一日唔訂,每次瀏覽都會彈出嚟,而且有啲係你又㩒走,就連其他操作都做唔到,可以話係極度煩人。

好消息嚟喇,Mozilla 同 Google 都計劃喺下一版本 Firefox 及 Chrome 上,逐步隱藏呢啲彈出式訂閱通知。Mozilla 嘅理由好簡單,佢哋做咗一個月調查,透過分析 Firefox 63 用戶嘅行為,發現約 99% 彈出式訂閱都唔會被接受,當中 48% 更加係網民主動拒絕,根據佢哋嘅資料顯示,14.5 億個彈出式訂閱中,只得 2.3 千萬個會被用戶接受,可見都幾唔受歡迎。

彈出式訂閱功能唔單只煩,仲俾黑客利用嚟發動攻擊。有黑客為咗呃網民訂閱,更製造假消息,例如要下載或播某啲片,必須先訂閱咗佢個網站;當網民訂閱後,黑客就會喺 pop-up notification 中加料,不停將惡意軟件、成人或賭場廣告資訊推送俾網民,唔小心 click 錯咗就有可能中毒,激嬲好多用家。Mozilla 於是決定由 Firefox 70 版本開始,會將訂閱選項內的 Not Now 轉為 Never,等網民唔使次次都揀 Later。而去到版本 72,就更加會將訂閱選項縮入網址列,等網民自己決定係咪要 Click 入去訂閱。

Google 方面亦有類似動作,不過玩法係由 Chrome 79 開始,會喺瀏覽器加入 「Quieter notification permission prompts」選項,啟動後就可以隱藏彈出式訂閱頁面,但如有需要,網民都可以好易 call 返訂閱掣出嚟。

資料來源:https://bit.ly/2PPIkc0

相關文章:【識玩一定玩69】新版Firefox 預設反跟蹤停用Flash

 

Privacy Preference Center