IT業界資訊媒體

【會員福利】Firefox Lockbox 密碼管理器推出 Android 版

Firefox Lockbox Firefox 為自家瀏覽器用戶推出嘅專用密碼記錄 app,上年中其實已推出咗 iOS 版本,而家就出埋 Android 版本。用法非常方便,用家只要喺手機安裝 Firefox Lockbox app,兼且登入返 Firefox 瀏覽器嘅同一帳戶,稍為設定一下之後,以後你喺 Firefox 瀏覽器上輸入過嘅帳戶名稱、密碼,就會自動被同步去 Lockbox 裡面,用家可以隨時進入查閱,以後就唔使成日要㩒「忘記密碼」,先可以登入返自己咁多個帳戶啦。

Firefox Lockbox 自動同步密碼

為咗減少洩漏一次密碼,就搞到自己所有帳戶都被偷走嘅風險,資安專家都會建議大家喺登記每個帳戶時,盡量唔好用重複密碼,而且亦要經常更改。不過,而家設置密碼嘅要求超複雜,除咗起碼要 8 個字元,又要包含大細楷、數字,甚至要加埋標點符號先合格,試問如果每個帳戶都要一組新密碼,又點可能記得住呢?如果真係咁簡單,咁 12345678password 呢啲神級密碼就唔會年年排喺最強密碼榜榜首啦。而密碼記錄 app 嘅誕生,就係為咗成為大家嘅管理密碼好幫手,特別係 Firefox Lockbox,因為只要平常係用 Firefox 瀏覽器嚟登入帳戶,就可以自動同步至 Lockbox 內。

保安性能高

要達成自動同步,用家必須先登入 Firefox 瀏覽器,然後利用瀏覽器再登入自己唔同帳戶,之後用手機打開 Firefox Lockbox ,就會見到晒呢啲帳戶嘅登入名稱及密碼,而且仲可以㩒返文字出嚟睇,非常方便。用家亦唔使擔心密碼記錄會俾人偷睇到,因為每次開 app,都要利用用家嘅密碼或指紋先可以解鎖,亦可以設定成閒置一分鐘就鎖 app 。至於登入帳戶嘅名同密碼,都係利用 AES-256 演算化去加密,確保 Firefox 唔可以讀取到你嘅登入私隱,仲唔快啲去 Google Play App Store 下載嚟用?

【會員福利】Firefox Lockbox 密碼管理器推出 Android 版
所有曾於 Firefox 上登入過嘅帳戶資料及密碼,都會自動同步至 Firefox Lockbox 內。

資料來源:https://lockbox.firefox.com