IT業界資訊媒體

【斷人衣食?】Google 停止轉讓專利技術 華為手機銷量隨時勁插

華為(Huawei)手機近年憑住連月球表面都影到嘅高質素攝力,喺智能手機市場掀起翻天巨浪,全球銷量勁升四成以上,原本好有可能超越 Samsung 及 Apple。不過,呢個夢想可能隨住 Google 停止提供專利技術,成為泡影。

美國總統侵侵上星期三發出行政命令,禁止美國企業使用對國家安全構成風險嘅企業所生產嘅電訊產品,當時已預計華為會首當其衝被打擊,果然美國商務部即刻跟進,將華為列入黑名單之內。隨之而嚟,科技界巨頭 Google 喺剛過去嘅周末,亦已暫停向華為轉移軟件及硬件方面的專利技術,換言之,嚟緊嘅華為手機只可以採用開放源碼授權嘅 Android 系統,核心及最常用到嘅 Google Play、Gmail、Google Maps 等應用軟件嘅功能,全部都會用唔到,而且亦唔會更新到 Android 作業系統,即使 Google嘅 Android 作業系統被發現到有乜嘢重大漏洞需要即時更新,用家亦無可能第一時間得到照顧,對華為嘅智能手機海外市場造成非常嚴重嘅打擊。

【斷人衣食?】Google 停止轉讓專利技術 華為手機銷量隨時勁插
華為嘅 P30 Pro 具備 5 倍光學變焦,加上 10 倍電子變焦,50 倍變焦功能據稱連月球表面陰影都影到。不過亦有人懷疑月球相只係 AI 後製。
華為銷量逆市上升

根據市場調查公司 IDC 最新嘅報告,當 Samsung 及 Apple 喺 2018 年第四季嘅智能手機銷量雖然排名全球第一、二位,分別佔 18.7% 及 18.2%,但比起上一年同期都下跌 5.5% 及 11.5%。相反,華為嘅同期表現就上升咗 43.9%,全球銷量佔 16.1%,直追 Samsung 及 Apple 之後。至於點解升勢咁凌厲?當然同佢嘅高質影相能力有關,不單只景深效果出色,低光環境攝力更遠遠拋離其他手機品牌,再加上早前華為 P30 Pro 推出,憑住 5 倍光學變焦鏡頭,令社交平台瘋狂出現月球表面洗版 Post,的確為沉悶一時嘅智能手機市場帶嚟新鮮感。不過,今次 Google 選擇暫停為華為供應專利技術,相信將會對華為嘅智能手機銷量造成巨大影響,除非有人鍾意還原基本步,影相用一部手機,上網、講電話又用另一部啦。

資料來源:https://reut.rs/2w5B3K1

相關文章:【江湖扼殺令】特朗普宣布進入「全國緊急狀態」