IT業界社群及資訊平台

【斬斷新冠傳播鏈】iOS、Android 手機新功能幫手搵出緊密接觸者

Apple 推出咗新嘅系統更新檔 iOS 13.7,而喺呢個新版本嘅「設定」版面,就多咗一個「暴露通知」(Exposure Notifications)功能,到底佢有乜作用呢?原來佢係有助終止 COVID-19 傳播鏈喎!不過又會唔會有私隱漏洞存在呢?

新冠疫情反覆,有傳染及感染學專家更認為將要同病毒共存,難以好似 SARS 一樣短時間內減,呼籲公眾做好心理準備。事實上,唔想好似早前香港第三波疫情爆發嘅場面再度出現,就一定要做好病源及傳播追蹤,先可以將緊密接觸者全部隔離。而今次 Apple 喺推出嘅 iOS 13.7 更新版本中,就追加咗一項有助追蹤確診人士接觸過邊啲人嘅 contact tracing 功能,唔使政府部門自己開發及營運一隻獨立嘅追蹤應用軟件。

Apple 嘅「暴露通知」追蹤系統運作原理,主要係利用 iPhone 內嘅藍牙技術,記錄機主身邊兩米範圍內曾經有乜嘢人經過,當有機主確診而佢又選擇向系統上報,Apple 就會向佢嘅緊密接觸者發出通知,令佢哋可以及早去做檢驗及隔離,盡快斬斷呢條傳播鏈。

雖然呢個功能係好,但自不然令人擔心咁樣會唔會暴露咗自己嘅行蹤,同埋上報後其他緊密接觸者會唔會即刻俾政府捉去強制隔離?Apple 就強調除非得到你嘅許可,否則所有資料係唔會同有關部門分享,而且確診記錄亦可以選擇匿名上報,保障到用戶嘅個人私隱。當然,最大問題係你信唔信Apple會咁做啦,反正我就相信了。

順帶一提,「暴露通知」功能係預設咗關閉嘅,如果大家想用就要喺「設定」入面開啟。另外,Google 嘅 Android 系統亦會喺今個月推出嘅更新內加入呢項功能,而且兩個系統係可以互通,所以如果全民參與嘅話,就會更準確咁提醒每個市民有無感染風險,唔使再疑神疑鬼走去做檢測啦。

資料來源: https://bit.ly/3lKNL9P

唔想錯過熱門網絡保安消息,請即訂閱 wepro180 電子周報:https://bit.ly/2ZcCi9J