IT業界資訊媒體

【攞多咗】16億人用緊 免費防毒軟件緊急移除

正常一隻手機防毒軟件,安裝時會問你攞乜嘢權限呢?首先上網功能就一定要啦,唔係點樣下載最新嘅病毒資料特徵?其次就係存取檔案嘅權限,因為當發現有病毒軟件或中毒檔案,都要攞到權限先可以清除或隔離。咁如果佢問你攞相機、收音咪、實時位置等權限呢?咁就千祈唔好裝啦,呢啲權限對防毒有乜幫助?唔通病毒可以用相嚟舉報?去到某啲地理位置,中毒風險會特別高咩?

話就係咁話,不過好明顯大家喺裝之前都唔會睇佢攞緊你啲乜。網絡安全服務供應商 VPNpro 早前測試咗 Google Play 上 15 款熱門免費 Android 防毒軟件,睇吓佢哋攞緊幾多額外權限。結果發現當中 6 款加埋超過 16 億次下載數量嘅防毒軟件,都額外攞緊一啲有可能導致用家私隱外洩嘅不必要權限。VPNpro 專家特別指出 Virus Cleaner、Security Master、Clean Master 呢三款軟件,其實早前已被指濫索權限,但直至現時為止每個月都仲有數以百萬計用家下載,好明顯大家都唔認為自己嘅私隱貴過一套收費嘅防毒軟件。

喺測試嘅 15 款防毒軟件中,平均會向用家索取 6 種不必要嘅權限,例如索取相機、GPS 位置、聯絡人資料、錄音等等,報告更特別指出索取 GPS 位置嘅嚴重性,因為可以知道用家即時位置,絕對有可能為人身帶來風險。而其中三間防毒軟件開發商,報稱公司竟然屬於香港同一地址。專家建議大家應即時檢查手機內嘅軟件正攞緊啲乜嘢權限,有懷疑應該即刻刪除唔好再用。而 6 款最有問題的防毒軟件包括:Security Master、Antivirus Free 2019、Virus Cleaner(Max Security)、Super Phone Cleaner、Clean Master,如果你都有安裝到,就要即刻行動喇。

資料來源:https://bit.ly/2qI1Nkc

相關文章:【自身難保】研究發現近半 Android 防毒軟件有問題