IT業界資訊媒體

【打包下載】Flash年尾終止支援 Flashpoint收錄38000舊遊戲任玩

曾幾何時,Flash game 都係唔少人喺 office 嘅 kill time 良伴,雖然玩法相對嚟講簡單,畫面又唔係特別靚,但喺未有手遊之前,你仲有乜嘢選擇先?而隨住 Adobe、Google、Microsoft、Mozilla、Apple 等公司即將喺今年尾後停用,呢堆 Flash game 將會完成歷史使命,壽終正寢⋯⋯不過,有組織就開發出 Flashpoint 軟件,等 Windows 用家可以將 38,000 隻遊戲打包下載,等佢哋可以流傳萬世咁話。

大家可能未必知道,近排被捧為預言神 game 嘅手遊《瘟疫公司》,佢嘅設計概念就係嚟自 2008 年推出嘅 Flash game《流感大流行2》,不過玩法當然簡單好多啦。而為咗保護呢一堆 Flash game,BluxMaxima 就設計出 Flashpoint 軟件,提供兩個版本,一個係內藏超過 38,000 隻 Flash game 嘅完全版,大約 288 GB 容量;Infinity 版本就只佔 256 MB 容量,不過就要花時間逐隻下載想玩嘅遊戲落嚟。

以香港人嘅性格,見到有免費遊戲梗係心思思想下載咗先啦,不過,網絡安全專家就提醒大家要小心喇,因為 Flash 正係因為有大量漏洞存在,Adobe 先會選擇放棄,同時令 HTML5 彈起,所以如果 Flash game 本身有惡意程式,亦有可能下載埋落嚟;再者由於 已唔會再有人去修補 Flash 嘅漏洞,到底仲有乜嘢缺口真係未知之數,所以勸喻大家最好就唔好玩啦反正有其他選擇。

順帶一提,BlueMaxima 其實無主動聯絡 Flash game 開發商會免費提供俾用家玩呢堆遊戲,只係叫開發商有意見就可以發信要求移除,可以話係未授權嘅遊戲。既然有咁多風險,都係諗清楚先下載啦!

資料來源:https://bit.ly/39cpfHx

相關文章:【識玩一定玩69】新版Firefox 預設反跟蹤停用Flash