IT業界社群及資訊平台

【打假神器】美國總統大選在即 Microsoft 三招清除 Deepfake 內容

透過人工智能技術編輯影片、相片或聲音檔案,達到以假亂真嘅 Deepfake 技術,由於效果實在太逼真,容易喺社會上散布虛假訊息,所以一直係全球政府及社交平台首要解決嘅問題。特別係美國總統大選在即,呢啲虛假訊息隨時可以令選情逆轉添!就喺呢個時候,Microsoft 宣布推出一套可以偵測 Deepfake 內容嘅工具 Microsoft Video Authenticator,借助人工智能去分析影片或相片中嘅瑕玼,再提供可信度俾用家自行判斷內容真偽,絕對有助打擊虛假訊息嘅散播。

點解 Deepfake 技術咁得人驚?因為佢都係利用人工智能深度學習嚟製造虛假內容嘅技術,一方面人工智能會自行產生愈嚟愈精細嘅內容,同時間另一組人工智能就會愈嚟愈精準咁識破虛假內容,喺兩套人工智能嘅競賽下,虛假內容自然愈嚟愈像真,好多時肉眼已分唔到真假。而 Microsoft 呢套工具,亦同樣使用人工智能技術,用咗 FaceForensics++公開嘅 1000 組 Deepfake 資料庫以及 Facebook 嘅 Deepfake Detection Challenge 數據,餵俾 AI 深度學習,從而可以仔細咁分析例如影像內人臉表情、顏色、像素有無古怪。可惜呢套技術暫時就唔會開放俾公眾使用,Microsoft 話只會對有公信力嘅組織例如 AI Foundation,以及傳媒如 BBC、紐約時報等使用,等佢哋可以用嚟分析收到嘅多媒體內容真偽,同時提供意見繼續提升 Microsoft Video Authenticator 準確度。

【打假神器】美國總統大選在即 Microsoft 三招清除 Deepfake 內容

除咗提供分析利器,Microsoft 仲係 Azure 度加入咗數碼證書俾內容供應商,可以俾佢哋喺影片等相關內容到加入無法修改嘅 Hash 值,就算喺網上經過幾多手轉載,一樣可以喺 Metadata 內搵得返。同時亦會喺瀏覽器提供擴充程式,用嚟閱讀及驗證呢啲檔案嘅 Hash 值,令分辨真假內容變得更方便。

資料來源:https://bit.ly/3bnO3hT

唔想錯過熱門網絡保安消息,請即訂閱 wepro180 電子周報:https://bit.ly/2ZcCi9J

Privacy Preference Center