IT業界資訊媒體

【恐怖E學】牙線、手機充電線都會傳染病毒

唔單只牙線唔可以交換用,就連手機充電線都唔得,因為都有可能引發病毒感染㗎!

近排搭車成日碌手機睇新聞睇片,搞到部 iPhone 好快無電,相信唔少 iPhone 用家都會喺公司擺多條 Lightning 線駁電腦充電。但你有無諗過,插住果條線好可能係鬼線,只要你開著電腦做嘢,隨時可以俾黑客偷走資料?

手機充電線內藏病毒

其實好多手機用家對充電線都無乜戒心,基本上有需要時就會四圍問人借線充電。理解嘅,因為咁細條充電線,可以惡得去邊丫?有黑客為咗提高公眾對充電線嘅安全意識,特別整咗條像真度高達 100 % 嘅 Lightning 線出嚟,但就內置 Wi-Fi 接收器同惡意軟件,只要目標人物將呢條線插入電腦,黑客就可以透過 Wi-Fi 訊號發出指令,指示惡意軟件執行特別任務,例如引導瀏覽器去釣魚網站,又或將電腦進入鎖定模式,強制要用家輸入登入資料,從而盜取登入系統權限。當然,職位愈高,帳戶可接觸嘅公司資料都愈機密。

製作呢條古惑 Lightning 線嘅黑客 MG,本身係 Verizon Media 嘅網絡安全 Red Team 成員,日常工作就係諗盡各種辦法去攻擊公司嘅安全系統。今次呢條古惑 Lightning 線只係佢個人嘅特別計劃,MG 話雖然好多人都知唔可以隨便插入 USB 手指,但對手機充電線或傳輸線反而無戒心,所以佢就打手機線主意,仲要特登揀 Lightning,因為 iOS 系統一向比 Android 難搞咁話,只要搞得掂 iOS,理論上其他手機線都無難度。成個製作過程非常花時間,因為呢條線必須具備 Wi-Fi 接收功能同內置記憶體裝惡意軟件,零件要非常精密,所以 MG 要出動 3D 打印技術將部件印上去,每條平均要整四個鐘。

MG 已經喺 DEFCON 上向入場人士隨機派發,不過佢話呢條線未係完成版本,佢將會為條線增加更多惡意功能。預計完成版會喺網上發售,每條約 100 美元。作為一般用家,要防止自己無辜中招,隨咗唔會亂用人哋嘅充電線,最好就買一條造型比較獨特嘅線跟身,就算想暗中交換都咁易啦。

資料來源:https://tcrn.ch/2Tqgoew

相關文章:【獨家專訪】楊和生 先天缺黑帽基因