IT業界社群及資訊平台

【性勒索目標】鹹網一開 惡運自然來

香港人壓力咁大,男士們少不免會去睇下鹹網減壓,不過防毒軟件商 ESET 最近就發現咗有隻叫 Varenyky 嘅新病毒,會偷偷錄起你去鹹網嘅畫面,隨時有可能用嚟勒索你,減壓不成反而仲大壓力,認真慘慘豬!

其實呢隻病毒都出現咗一段時間,今年五月左右開始喺法國境內活躣,暫時未見佢出現喺其他國家或者地區。最初佢嘅「毒性」好溫和,主要都係針對法國當地用緊 Orange 呢間電訊商嘅客,不外乎用有筍價手機嘅宣傳單張嚟引你注意,冇睇清楚唔小心撳咗入條 link 就中招,手法唔算特別。

ESET 一直監察呢隻病毒,發現佢無時無刻都喺度變種,密密不停加入新功能,而且七月開始亦唔再出手機推廣電郵,而係出性勒索電郵。經過 ESET 專家深入調查,發現佢加咗段程式碼,只要瀏覽器出現 sexe(sex 法語)字眼,就會啟動 FFmpeg 程式,將用家睇緊嘅畫面錄起,然後將段片傳去病毒嘅原伺服器。

雖然仲未知道黑客錄呢段片想點,但好大可能係想拎嚟勒索對方,因為專家發現 Varenyk 有另一個隱藏功能,可以透過瀏覽器或者電郵程式,記低用家登入電郵嘅用戶名同埋密碼,換句話說,有機會靠呢啲資料連繫到用家嘅真正身分,但係真正要點樣運作就仲未知,要等 ESET 進一步嘅公布。不過,留呢啲病毒喺電腦絕對唔會係好事,所以只要 keep 住更新防毒軟件就可以清走佢,繼續放心上網「減壓」啦!

資料來源:https://zd.net/2Mc6kVS

相關文章:【好窩心!】Firefox 新分頁會幫你自動隱藏成人網站紀錄