IT業界資訊媒體

【得罪方丈】微軟禁止員工用Slack

有炒開美國科技股嘅,一定有留意上星期上市嘅 Slack,掛牌第一日就升破招股價,最終收報 38.62 美元,較開市價高 48.5%。雖然第二日股價略為調整,但依然係今年美國上市第二高估值嘅科技公司,僅次於 750 億美元嘅 Uber,但就贏咗另一風頭躉 Lyft,巧威威!而 Slack 仲係第二間直接喺紐約證券交易所掛牌嘅公司,毋須公開集資,創辦人 Stewart Butterfield 話原因係佢哋唔缺錢,真係型到呢……

正所謂樹大招風,喺 Slack 份上市文件入面都講到明,微軟係佢哋頭號競爭對手,咁微軟梗係唔會坐定定乜都唔做啦!就喺 Slack 上市當日,微軟就向員工發出內部通告,禁止十幾萬名員工使用 Slack 作為通訊工具。通告一出,梗係惹嚟大量揣測,因為微軟都有款叫做 Teams 嘅企業通訊工具,早前微軟市值突破一萬億美元時,德意志銀行分析師 Karl Keirstead 份研究報告就指出,微軟高層將 Teams 視為未來最矚目嘅產品,所以禁止員工用Slack,好難唔令人聯想微軟係要打壓「異見分子」。

微軟自然例牌否認呢個講法,佢話無論 Slack Free、Slack Standard 抑或 Slack Plus,都冇做足安全措施去保護使用者嘅知識產權,如果微軟員工茂茂然用 Slack 嚟討論公司產品發展,就等同將屬於公司嘅寶貴知識產權暴露於人前,係好危險嘅做法!而事實上呢樣嘢的確係可大可小,尤其近年商業間諜活動已提升到國家層面,微軟作為美國指標性企業,唔只要防範對手偷料,仲要承受美國敵對國家嘅黑客攻擊,人哋會動員成個國家資源去做呢件事,真係唔到微軟唔謹慎處理架!

當然你話微軟完全冇私心就唔可能㗎喇,仲要人哋上市先出通告「贈慶」,一定係意有所指啦!咁又難怪嘅,事關 2017 年Microsoft Teams 正式推出時,Slack 就喺《紐約時報》買咗全版廣告,洋洋千字鴻文「善意提醒」微軟開發企業通訊工具冇想像中咁簡單㗎,方丈到今時今日先出通告唔俾員工用 Slack 已經好俾面。通告仲話雖然 Slack Enterprise Grid 冇發現保安問題,但係都「鼓勵」員工用返自家產品 Microsoft Teams,呢句就更明顯係私人恩怨喇!

唯一值得Slack欣慰嘅,係通告並非針對佢哋一間公司,微軟對其他對手例如 Google 同埋 Amazon 嘅產品都列入黑名單,最離奇係微軟舊年先用咗 75 億美元收購 GitHub,都出現喺名單之上,真係冇大細超喎?

資料來源:https://bit.ly/2Rty2x4

相關文章:【念念不忘】Microsoft 推更新包堵漏洞 XP、Server 2003一樣有份