IT業界資訊媒體

【密食當三番?】6大原因 中小企係黑客心目中嘅魚腩!

好多中小企業嘅經營者成日都以為自己公司嘅規模太細,點會成為黑客嘅攻擊目標?實情係有調查顯示,英國有過半數小企業喺一年內曾遭受黑客攻擊,由此可見黑客絕對無輕視中小企業嘅重要性,反而密密攻擊佢哋添,究意點解呢?
黑客之所以咁鍾意攻擊中小企業,其實道理都離不開以下 6 個:
1. 攻擊容易
正所謂密食當三番,與其造大牌,不如輕輕鬆鬆食幾鋪雞糊好過。中小企業嘅保安意識同防禦能力都較大企業差,黑客自然會捨難取易。
2.欠缺自救能力
中小企業經營者一般都唔多重視網絡安全,唔單只無做好防禦措施,就連檔案都好少備份。一旦重要檔案被黑客加密,既無能力解鎖,又無備份檔案,自然較易交贖金。
3.有價值資料
只要有生意買賣,就一定牽涉好多客戶交易紀錄以及公司嘅財務資料,呢啲資料除咗可以喺暗網賣,黑客亦可以利用嚟發動社交工程攻擊,絕對唔係無價值。
4. 入侵大企業渠道
如果中小企業有向大企業提供服務,例如提供一啲網絡應用,黑客就有可能喺當中搵到漏洞入侵大企業,成為黑客攻擊嘅最佳跳板。
5. 相同供應商
中小企業經營者大多選用相同服務嘅供應商,攻破其中一個,就代表可以攻擊埋其他採用相同服務嘅中小企。
6.同大型企業相比,甩身機會大。
如果你係中小企業經營者,唔想做魚腩,請堅守 4 個原則:
1.安裝防毒軟件
即使無預算,網上亦有不少免費資源,可提供基本防禦。
2.加密數據
即使數據被盜取,都唔會咁易被破解。
3.減少流動設備
流動設備容易失竊或受攻擊,應鼓勵員工使用雲端應用工作。
4.定期備份
即使被勒索軟件加密,都仲有後備數據。
資料來源:https://bit.ly/2vEvjps