IT業界資訊媒體

【完美 P圖 】AI 作反改驗身報告 癌症患者延醫失救

醫療業愈來愈受到黑客「關愛」已經唔係乜嘢秘密,除咗可以盜取病人資料賣錢,更可怕嘅係黑客可以利用 AI 人工智能即時 P圖 改寫驗身報告,令醫生無法作出正確嘅診斷,舉例只要塗改磁力共振、電腦掃描嘅影像檢查結果,就可以捽甩上面嘅癌細胞陰影,延誤病人接受治療嘅時機,殺人於無形。

自動化P圖呃盡專家

按照身體各位置,醫生必須以相對應嘅影像檢查方法去診斷癌細胞嘅情況,例如腦、肝、腎等器官較適合以無輻射嘅磁力共振進行檢查,相反對於會跳動或空心嘅器官例如心臟、肺等,就必須用電腦掃描進行檢查,醫護人員可以很快嘅速度得出驗身報告,供醫生診斷並決定治療方向。如果呢啲影像檢查器材被黑客入侵,後果可以好大件事,例如延遲接受癌症治療增加病人嘅死亡風險,又或令正常人無辜捱刀或承受放、化療嘅副作用。

以色列 Ben-Gurion University 嘅資訊系統工程部門剛啱喺 4 月初發表研究報告,指出透過訓練 AI 系統去學習電腦掃描(CT Scan)影像,令系統理解肺部影像上有癌細胞及無癌細胞嘅分別,同時利用 AI 即時 P圖 ,分別進行添加或抹走癌細胞嘅動作,並將 100 張影像拎去俾 3 位放射師檢查,結果係超過 9 成判斷係錯嘅。原本有癌細胞嘅影像,已經完全被 AI 清理;而正常影像就完美地被添加癌細胞。研究團隊指出雖然大部分嘅影像檢查器材係離線操作,但要用各種手法接近呢啲器材,再通過 USB 安裝惡意程式並唔係難事;一旦將來連線上網就更加危險,隨時可以被黑客利用嚟對付目標人物。

資料來源:https://bit.ly/2uQSyNp

相關文章:【AI 照騙】Nvidia GauGAN 繪圖神器 唔自然畫出自然相