IT業界資訊媒體

【夜鶯計劃】Google夥拍醫健機構Ascension 惹病歷外洩恐慌

Google 管有大量網絡用家嘅個人私隱,所以大家都會對佢嘅安全措施感到憂慮,擔心佢會好似上年咁洩漏 50 萬 Google+ 用戶資料之餘,又驚佢會好似處理 Google Home 語音助理一樣,允許承包商聽取用家嘅談話內容。所以當收到消息,指 Google 已同美國第二大醫健機構 Ascension 簽約,可以利用對方旗下 150 間醫院及超過 50 間長者宿舍嘅病人資料,作為供給人工智能及機器學習嘅數據,以提升醫療中心嘅運作效率及病人嘅安全性。

消息一傳出,唔少美國網民都好擔心自己嘅病歷都會成為研究對象,因為呢個號稱為夜鶯計劃嘅合作,可利用嘅私隱相當廣泛,包括化驗室資料、醫生診斷報告、醫療記錄以至病人嘅個人資料及病歷,一旦外洩,後果將會相當嚴重。不過,Ascension 方面就回應話今次合作絕對符合美國嘅 HIPAA 健康資料保密法要求,唔擔心 Google 會出事。

講返句公道話,其實 Google 都唔係第一次攞啲醫療數據嚟進行分析,例如佢哋就曾經花咗幾年時間,將大量磁力共振檢查影像及診斷報告輸入機器學習系統,令人工智能診斷病症更精準,同時又可以增加預測的準確性,減少醫療開支。

點講都好,家陣針對醫療機構嘅黑客攻擊大增,大家似乎都唔想自己嘅醫療紀錄會經咁多人嘅手,亦唔希望 Google 可以攞到啲咁個人嘅資料,例如早前佢哋以 21 億美元收購 Fitbit,除咗睇中對方嘅穿戴產品技術,亦希望可以進入數碼健康市場。但收購消息一公布,即時有 Fitbit 用家話要將產品掉入垃圾桶,你話用家幾唔放心呢?

資料來源:https://bit.ly/374wkcO

相關文章:【病歷賤賣】醫療紀錄千六蚊有交易 中國黑客專偷治癌資訊