IT業界資訊媒體

【回收注射器】糖尿病患者都有網絡安全風險

唔少網絡安全專家都警告,醫療器材將會成為黑客嘅主力攻擊目標。理解嘅,醫療系統儲存咗好多病人嘅個人私隱,特別係私家醫院就有好多公眾人物嘅病歷紀錄,掌握到呢啲可能未經公佈嘅消息,絕對可以多方向謀利,例如勒索對方、發佈消息去操控對方所持公司嘅股價等等。其實除咗可以非法攞到病人資料,仲可以操控性命。

美國食物及藥物管理局(FDA)喺上星期就發出警告,呼籲病人將由美國醫療科技公司 Medtronic 推出嘅胰島素自動注射器 MiniMed 嘅部分型號拎去回收,因為 FDA 發現呢啲產品存在網絡漏洞,可以俾有心人士隔空改變藥劑設定,影響病情。

由於糖尿病人無法分泌足夠嘅胰島素(Insulin),又或出現胰島素阻抗(Insulin Resistance),部分病人有需要口服或注射胰島素藥物,先可以轉化血液中嘅糖份;視乎病情,醫生會調校藥劑,維持體內嘅胰島素量,避免不足或過多。Medtronic 自動注射器嘅出現,就可以按照醫生嘅藥劑設定,自動為病人注入胰島素。不過,由於呢款產品備有無線連接功能,而 FDA 就發現咗有心人士可以喺接受範圍內,利用產品本身嘅漏洞進入系統,修改藥劑量設定,影響病情,所以就要求生產商回收產品。

其實除咗胰島素注射器,其他身體檢查醫療器材如果俾黑客攻擊,例如磁力共振、電腦掃描儀器等,就可以製造虛假檢查結果,有病變無病,無病變有病,令病人延遲接受醫療或製造恐慌,所以除非你一世人都唔使睇醫生,否則醫療漏洞絕對同所有人有關。

資料來源:https://bit.ly/2KOlrE7

相關文章:【醫療事故】醫院洩密 新加坡總理都中招