IT業界資訊媒體

【唔好太老定】點解要額外裝防毒?電話內置防毒唔夠咩?

「今時今日駛鬼裝防毒軟件咩?靠電腦/電話系統內置嘅防毒功能都夠做啦!」唔知你身邊係咪總有一兩個朋友係咁諗,不過唔好咁老定,正如香港人喺一個月之間,差唔多人人都要裝 VPN 傍身嘅時候,你就知道,網絡安全係愈謹慎愈好,想知點解明明本身有防毒系統,都要再裝防毒軟件同 VPN ?就等著名 I.T 雜誌 PC Magazine 嘅網絡安全分析師 Neil J. Rubenking 話過你知。

Window 篇——釣魚電郵、虛假網站表現麻麻

Windows 機本身都內置 Microsoft 防毒系統 Windows Defender Story,早期嚟講,Windows Defender Story 可以話係幾「流」架,喺一啲安全測試中,佢有啲評分只係得0分,不過都已經係幾年前嘅事,而家套系統逐漸有改善,而系統亦都會配合埋防火牆等保安功能防毒,亦可以稱為 Microsoft Windows Defender Security Center 。不過就算點改都好,佢地喺釣魚郵件、虛假網站呢方面嘅保安仲係好麻麻,對網站嘅防禦亦都只限於 Microsoft 自家瀏覽器,如果係用 Chrome 或者 Firefox 呢,Sorry 啦,防護力可以話係 0。所以 Windows Defender Story 頂盡只可以當 plan B,你一樣需要第三方軟件,為你嘅電腦提供更全面嘅保障。

Google Play Protect 篇——可能將安全軟件分辨爲有毒軟件

講講 Google Play Store ,如果一發現惡意軟件嘅存在,就會「即刻」將佢下架,不過要知道,Play Store 嘅審查門檻同過程無 Apple App Store 咁嚴謹,所以惡意程式係有機可乘,喺 Play Store 未發現有問題之前,你手機一樣會有機會中招。Google Play Protect 係 Android 機內置嘅防毒系統,根據一啲評測結果,佢嘅防護程度可以話相當弱雞。著名嘅電腦安全測試機構 AV-Comparatives 就做過測試,發現 Play Protect 比其他 9 種防毒軟件,有更大機會錯誤將安全軟件分辨為有毒軟件。而另一份報告亦顯示,喺一系列防毒軟件之中,當其他樣本都拎到接近滿分嘅時候,Play Protect 係防禦同易用程度,都係得 0 分。以上理由都證明咗 Play Protect 係唔夠保護性,一定要額外再裝防毒程式。

macOS 篇——兩道防線,較爲有保證

Apple 產品專用嘅 macOS 系統一向俾人感覺好安全,尤其係 App Store,相信大家都聽講過佢安全審查有幾嚴格,除非你用「其他方法」去下載程式,否則,安全程度都好有保證, 加上 macOS 仲有兩道防線,分別係 Gatekeeper 同 Catalina,都係好有效嘅保護機制,令到程式與程式之間有道屏障,無咁易俾惡意軟件一下子偷取個人資料。雖然係咁,我地之前都介紹過,有啲惡意程式都係專攻 macOS 系統,一樣會有風險,想穩陣啲?都係裝返 macOS 相容嘅防毒軟件就安心晒啦。

資料來源:https://bit.ly/39eRqGV

唔想錯過熱門網絡保安消息,請即訂閱 wepro180 電子周報:https://bit.ly/2ZcCi9J