IT業界資訊媒體

【咪搞錯】機器學習唔等於人工智能

近年推同科技有關嘅產品,只要加人工智能或 AI 字眼,身價即時上升。不過到底點先算係人工智能?然後機器學習(Machine Learning,簡稱ML)功能又係咩嚟呢?擁有機器學習功能就一定有 AI?下面就為大家一次過解答。

要解釋人工智能同機器學習嘅分別,首先就要回一回帶重溫歷史。如果有睇過幾年前《解碼遊戲》呢部戲,男主角 Alan Turing 一直都俾人叫做「電腦之父」,其實佢亦係第一個提出人工智能概念嘅人。佢喺上世紀 50 年代寫咗篇論文,用一個簡單測試去分辨機器識唔識得思考。方法好簡單,只要將相同問題搵人同電腦解答,得出嚟嘅答案係分唔到由邊個解答,就代表部電腦能夠思考擁有智慧,後世就叫呢個做 Turing Test。

呢個測試好有代表性,因為佢將人工智能嘅概念規範化,不過直到今時今日,都未有人可以百分百做到一部符合 Turing Test 要求嘅電腦,所以為咗貼地少少,有人就將人工智能定義收窄少少,只要電腦可以自行完成單一工作,而且做得比人類好,就叫人工智能喇!然後喺呢個狹義嘅人工智能定義下,又衍生咗機器學習呢個分類。1959年,當時喺 IBM 做工程師嘅 Arthur Samuel 發表話機器學習係電腦喺冇明確嘅程式導引下,依然識得自我學習,發掘出巨量資訊之中的關連。

好亂?唔緊要,舉幾個實用例子你就會明。好似 Facebook、Amazon 所用嘅推介引擎,根據你 Like 過乜、Share 過乜,然後向你推介相關嘅貼文或者產品,呢個就係機器學習其中一個應用。機器學習最叻就係收集完大量數據之後,可以從中學到新嘢,而且仲好有啟發性同埋前瞻性,所以近年好多企業都用機器學習嚟做預測性分析,幫公司排難解紛。

人工智能應用就廣泛好多,不過同機器學習唔同嘅係,好多都係為咗將工作自動化,例如 Google home 同埋 Amazon Alexa,同埋商界成日應用嘅chatbot,都係靠人工智能嚟自動幫你完成啲工作。

而喺資安界嘅應用,就係靠人工智能嚟搵出有冇入侵風險,例如靠檢測用戶唔尋常嘅活動,或者突然有大量數據無故流入或者流出,呢啲比較難靠人手去做嘅工作,就交俾人工智能搞掂。

簡單嚟講,機器學習係自動執行分析工作嘅裝置,而人工智能就可有助機器學習更快速、精準咁處理大量資料。下次人哋同你講人工智能同埋機器學習時,就識得點樣分啦!

資料來源:https://bit.ly/2nQ4yyM

相關文章:【語音誘罪】人工智能扮聲 成功呃走200萬港幣