IT業界資訊媒體

【咪亂裝】Android肺app會鎖機!

雖然 Google Play Store 嘅 app 都唔係百分百安全,但起碼叫做有人把關,而第三方 app store 甚至來源不明嘅 apk,危險程度就非常之高,所以一直都呼籲 Android 用家唔好安裝 Play Store 以外嘅 app。不過,黑客總係可以利用人心漏洞,例如最近好多人想好容易咁掌握最新肺炎疫情資訊,所以黑客就整咗隻 CovidLock 手機app 出嚟,話保證睇到最新情報,結果有 Android 用家咁就中招喇!

網絡安全公司 DomainTools 發現,網絡上流傳嘅 CovidLock app,本身係一隻勒索應用程式,只要用家安裝咗,CovidLock 就會即時鎖死 Android 裝置,並要求用家喺 48 小時內,交付價值 100 美元嘅 bitcoin 贖款,先至會提供解鎖密鑰,如果唔俾錢,就會刪除手機入面嘅相,仲會幫受害者刪除埋社交平台嘅帳戶添!DomainTools 話由於唔係經 Google Play Store 下載,所以未能掌握到底有幾多受害者。

黑客可能為咗趕喺疫情恐慌情緒踏入高峰嘅呢段時間推出,盡快呃多啲人下載,所以 CovidLock 嘅加密方法似乎有啲粗製濫造,DomainTools 嘅專家就話好快會提供解鎖工具,不過,原來喺 Reddit 上已有用家拆解咗隻 app,喺程式碼入面搵到 4865083501 呢組解鎖密碼出嚟,由此可見真係幾求其。

隨住疫情喺全球繼續爆發,都好肯定黑客會繼續發動借用新冠狀病毒名義嘅網絡攻擊,大家真係要打醒十二分精神,唔好因為恐慌情緒令自己跌入陷阱呀。 

資料來源:https://bit.ly/39YWIGf

相關文章:【武漢肺炎】專家話:恐慌情緒易中病毒